ԵՐԵՎԱՆ, 5 նոյեմբերի — Sputnik. Արցախյան հակամարտության գոտում վերիֆիկացիոն համակարգերի ներդրումը Հայաստանի կարևորագույն խնդիրներից է։ Այսօր ԱԺ–ում լրագրողների հետ ճեպազրույցում այս մասին ասաց ՀՀ ԱԳ նախարար Զոհրաբ Մնացականյանը` մեկնաբանելով ՌԴ ԱԳ նախարար Սերգեյ Լավրովի առաջարկը։
«Չեմ կարող ասել, որ մենք արդեն հասել ենք սրան, բայց սա է ամենակարևոր հարցը` որ մենք կարողանանք դադարեցնել կրակը ու հասնենք հոկտեմբերի 10–ին ձեռք բերված մեր համաձայնության առաջին երկու կետերի իրականացմանը»,– ասաց նախարարը։
Լրագրողները նաև հետաքրքրվեցին` որ փուլում են ՀՀ վարչապետ Փաշինյանի նամակից հետո ՌԴ–ի հետ սկսված խորհրդակցությունները, ու երբ տեսանելի կլինեն դրանց արդյունքները։
«Երբ որ մենք բոլորս կտեսնենք, վստահ եմ, որ դուք առաջինը կիմանաք,– կատակեց Մնացականյանը,– մեր խորհրդակցությունները շարունակվում են, ես ավելին չեմ կարող ասել»։
Թե հայկական կողմից ով է մասնակցում խորհրդակցություններին, Մնացականյանը նույնպես չպատասխանեց։
Պատասխանելով ՀԱՊԿ–ին դիմելու հնարավորության մասին հարցին` Մնացականյանն ասաց.
«Մենք մեր քայլերն իրականացնում ենք այնպես, ինչպես որ անհրաժեշտ ենք գտնում և ինչպես որ անհրաժեշտ ենք գտնում էֆեկտիվության, անհրաժեշտության առումով։ Այս պահի դրւթյամբ ՀՀ–ն իրականացնում է այն բոլոր գործառույթները, որոնք անհրաժեշտ է իրականացնել»։
Ինչո՞ւ է ՀՀ–ն դիմել ՌԴ–ին, բայց ոչ ՀԱՊԿ-ին. պատասխանում է Վաղարշակ Հարությունյանը
Հիշեցնենք` հոկտեմբերի 31-ին ՀՀ վարչապետ Նիկոլ Փաշինյանը նամակ է հղել ՌԴ նախագահ Վլադիմիր Պուտինին`առաջարկելով սկսել անհապաղ խորհրդակցություններ` սահմանելու աջակցության տեսակները և չափը, որը Ռուսաստանը կարող է հատկացնել Հայաստանին իր անվտանգության ապահովման համար՝ հիմք ընդունելով Հայաստանի և Ռուսաստանի միջև դաշնակցային հարաբերությունները և 1997թ. օգոստոսի 29-ի «Բարեկամության, համագործակցության և փոխադարձ աջակցության մասին» պայմանագրի 2-րդ հոդվածը։
Ռուսաստանի արտաքին գործերի նախարարությունը, արձագանքելով Նիկոլ Փաշինյանի նամակին, հայտարարեց, որ համաձայն ՀՀ-ի և ՌԴ-ի միջև կնքված համաձայնագրի՝ Ռուսաստանն անհրաժեշտ օգնություն կցուցաբերի, եթե ռազմական բախումները տեղափոխվեն անմիջապես ՀՀ տարածք։
Նոյեմբերի 3-ին ՀՀ ԱԳՆ–ն հայտարարեց, որ Հայաստանն ու Ռուսաստանը «Բարեկամության, համագործակցության և փոխադարձ աջակցության մասին» պայմանագրի շրջանակներում ինտենսիվ խորհրդակցություններ են իրականացնում։
Եթե ռազմական բախումները տեղափոխվեն ՀՀ տարածք, ՌԴ–ն կօգնի. Փաշինյանի նամակի պատասխանը
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 4-ի ժամը 13։30-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7155 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 252 անօդաչու սարք, 16 ուղղաթիռ, 25 ինքնաթիռ, 697 զրահատեխնիկա, 6 ՏՈՍ համակարգ։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
