ԵՐԵՎԱՆ, 10 նոյեմբերի – Sputnik. Ռուս խաղաղապահներին տեղափոխող ավտոշարասյունը Գորիսից ուղղություն է վերցրել դեպի Արցախ։ Տեղեկությունը հայտնում է ռուսական RT-ն։ Լրատվամիջոցը նաև խաղաղապահների ավտոշարասյան տեղաշարժը ներկայացնող տեսանյութ է հրապարակել Սյունիքի մարզից։
Մինչ այդ արդեն հայտնել էինք, որ ռուսական երկու Իլ-76 ինքնաթիռ է մեկնել Ուլյանովսկ-Վոստոչնի օդանավակայանից։
Ինքնաթիռներից մեկում օդանավի անձնակազմն է ու զրահամեքենան։ Մյուս օդանավում խաղաղապահ զորամիավորման անձնակազմն է, ինչպես նաև նյութական միջոցներ և ավտոմոբիլային տեխնիկա։
Ընդհանուր առմամբ Ռուսաստանից արդեն խաղաղապահներ տեղափոխող 8 ինքնաթիռ ու տասնյակ ավտոմեքենաներից բաղկացած ավտոշարասյուն է տեղափոխվել Արցախ։
Ավելի վաղ հայտնի էր դարձել, որ ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
ՀՀ վարչապետ Նիկոլ Փաշինյանը Facebook–ի իր էջում գրել էր, որ անձամբ իր և բոլորի համար ծանր, չափազանց ծանր որոշում է կայացրել:
Նա նշել էր, որ Ռուսաստանի և Ադրբեջանի նախագահների հետ ղարաբաղյան պատերազմը ժամը 01.00-ից դադարեցնելու հայտարարություն է ստորագրել, շեշտելով, որ այդ որոշումը կայացրել է ռազմական իրադրության խորը վերլուծության և այդ իրադրությանն ամենալավ տիրապետող մարդկանց գնահատականի արդյունքում, նաև հիմնվելով այն համոզմունքի վրա, որ ստեղծված իրավիճակում սա հնարավոր ամենալավ հանգուցալուծումն է:
Փաշինյանի հայտարարությունից հետո բազմաթիվ մարդիկ հետիոտն ու ավտոմեքենաներով շարժվել են դեպի Հանրապետության հրապարակ, մի խումբ ներխուժել է կառավարության գլխավոր մասնաշենք ու վարչապետի աշխատասենյակ, մի մասն էլ շարժվել է դեպի Բաղրամյան պողոտա ու մտել Ազգային ժողովի շենք։ ԱԺ նախագահ Արարատ Միրզոյանը ծեծի է ենթարկվել, նրան տեղափոխել են հիվանդանոց։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Կրակը դադարեցվում է. ինչի տակ են ստորագրել Փաշինյանը, Պուտինն ու Ալիևը
Նոյեմբերի 9-ի ժամը 10։30-ի դրությամբ` հայկական կողմից զոհվել են 1221 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Ո՞ւր է այդ...». քաղաքացիները ջարդել են դռներն ու մտել ՀՀ կառավարության շենք. տեսանյութ
