ԵՐԵՎԱՆ, 15 նոյեմբերի – Sputnik. ԵԱՀԿ Մինսկի խմբի բոլոր համանախագահ երկրները հանդես են եկել ընդդեմ Ղարաբաղյան հակամարտության ռազմական լուծման, հայտարարել է ՌԴ նախագահի մամուլի քարտուղար Դմիտրի Պեսկովը՝ «RT-Россия» հեռուստաալիքին տված հարցազրույցում։
«Իրականում Բաքուն Թուրքիայի Հանրապետության աջակցությամբ հայտարարել էր, որ Ղարաբաղյան հակամարտության լուծման համար հնարավոր է համարում ռազմական մեթոդները։ Հենց այդ մոտեցումից ելնելով էլ Բաքուն ռազմական օպերացիա սկսեց»,-ասել է Պեսկովը։
Նրա խոսքով՝ կոնտակտային խմբի համանախագահներից ոչ մեկը չէր կիսում Բաքվի մոտեցումը՝ փորձելով Ադրբեջանի նախագահ Իլհամ Ալիևին ուղղորդել դեպի հակամարտության կարգավորման քաղաքական-դիվանագիտական ճանապարհը։
«Այդ ռազմական գործողությանը նախորդել են ԵԱՀԿ Մինսկի խմբի համանախագահների և առաջին հերթին Ռուսաստանի կողմից տարիներ շարունակ կարգավորման որոշակի ձևեր առաջարկելու փորձերը։ Այդ ձևերը գոյություն ունեին, դրանք հայտնի են միջազգային բանակցային գործընթացի մասնակիցներին։ Ցավոք, այս կամ այն պատճառով դրանք չեն աշխատել»,-ասել է Պեսկովը։
Նա հավելել է, որ եթե դրանք ընդունվեին թեկուզ երկու տարի առաջ, ապա հազարավոր զոհերից հնարավոր կլիներ խուսափել։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
ՀՀ վարչապետ Նիկոլ Փաշինյանը Facebook–ի իր էջում գրել էր, որ անձամբ իր և բոլորի համար չափազանց ծանր որոշում է կայացրել:
Փաշինյանի հայտարարությունից հետո բազմաթիվ մարդիկ շարժվել են դեպի Հանրապետության հրապարակ, մի խումբը ներխուժել է կառավարության գլխավոր մասնաշենք ու վարչապետի աշխատասենյակ, մի մասն էլ շարժվել է դեպի Բաղրամյան պողոտա ու մտել Ազգային ժողովի շենք։ ԱԺ նախագահ Արարատ Միրզոյանը ծեծի է ենթարկվել, նրան տեղափոխել են հիվանդանոց։
Նշենք, որ Թուրքիայի աջակցությամբ Ադրբեջանի սանձազերծած պատերազմի ընթացքում, ըստ վերջին տվյալների, հայկական կողմից զոհվել են 1339 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։