ԵՐԵՎԱՆ, 21 նոյեմբերի – Sputnik. Ռուսաստանի ԱԻՆ երկրորդ շարասյունը՝ մարդասիրական բեռով, Ռոստովի մարզից ճանապարհ է ընկել դեպի Լեռնային Ղարաբաղի մայրաքաղաք Ստեփանակերտ։ Տեղեկությունը հայտնում է գերատեսչության մամուլի ծառայությունը:
«Ռոստովի մարզում կազմավորված երկրորդ ավտոշարասյունն արդեն ընթանում է Կրասնոդարի մարզի տարածքով։ Այսօրվա ընթացքում այն կանցնի 630 կմ ճանապարհ;; Ընդհանուր առմամբ ներգրավված է 35 միավոր տեխնիկա և մոտ 40 հոգանոց անձնակազմ»,-նշված է հաղորդագրության մեջ։
ՌԴ ԱԻՆ առաջին շարասյունը Ստեփանակերտ կհասնի նոյեմբերի 21-ին` մոտավորապես օրվա կեսին։ Այս պահին այն Ստեփանակերտից 70 կմ է հեռու։
Ռուսաստանի ԱԻՆ-ը քաղաքապետարանի ներկայացուցիչների հետ համատեղ շարունակում է գնահատել Ստեփանակերտում, Մարտակերտում, Մարտունիում և Ասկերանում քանդված շենքերին պատճառված վնասը:
Նախարարության ձևավորած երկու ավտոշարասյունները Ստեփանակերտ են տեղափոխում 345 տոննա մարդասիրական օգնություն։ Հատուկ տրանսպորտով առաքվում են շինարարական նյութեր՝ սոցիալական ենթակառուցվածքի և տուժած բնակչության տների վերականգնման համար:
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
