ԵՐԵՎԱՆ, 4 դեկտեմբերի – Sputnik. Ղարաբաղում գլխավոր չկա, կա երկու հակամարտող կողմ և Ռուսաստանի, Հայաստանի և Ադրբեջանի ղեկավարների համաձայնությունը։ Ռուսական կողմը համակարգում է իր գործողությունները թե՛ մեկի, թե՛ մյուսի հետ, լրագրողների հետ զրույցում հայտարարել է ՌԴ նախագահի մամուլի քարտուղար Դմիտրի Պեսկովը:
«Այնտեղ, ճիշտն ասած, գլխավոր չկա։ Այնտեղ կա երկու հակամարտող կողմ՝ Հայաստանն ու Ադրբեջանը։ Այդ կողմերը միասին ստորագրել են հայտնի եռակողմ հայտարարությունը։ Եվ ի կատարումն այդ հայտարարության դրույթների` ռուս զինվորականները, ինչպես նաև ռուսական մարդասիրական առաքելությունը համակարգում են իրենց գործողությունները թե՛ ադրբեջանցիների, թե՛ հայերի հետ»,-հայտարարել է Պեսկովը, խոսելով այն մասին, թե ում հետ են Արցախի ռուս խաղաղապահները համակարգում իրենց գործողությունները, և թե ով է այնտեղ «գլխավորը»։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
