ԵՐԵՎԱՆ, 9 հունվարի – Sputnik. Որոնողափրկարարական աշխատանքների արդյունքում Արցախում երեկ` հունվարի 8–ին, հայտնաբերվել է ևս 3 աճյուն: Sputnik Արմենիայի հետ զրույցում տեղեկությունը հայտնեց Արցախի արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը:
«Զինծառայողների աճյունները հայտնաբերվել են Ջաբրայիլի դիրքային գոտիներից մեկում։ Երեքն էլ զինծառակողների դիեր են եղել»,–ասաց նա։
Թադևոսյանը հայտնեց, որ այսօր և վաղը որոնողափրկարարական աշխատանքներ չեն իրականացնի. ռուս խաղաղապահները հերթափոխ պետք է կատարվի։ Նրա խոսքով`առաջին անգամ է, որ աշխատանքները կանգ են առնում, չհաշված երկու օր Հադրութ մտնելու` ադրբեջանական կողմի արգելքին։
Երկուշաբթի օրն արդեն իսկ որոնողափրկարարական աշխատանքները կշարունակվեն։
Ի դեպ, ընդհանուր առմամբ, 1197 զինծառայողի և քաղաքացիական անձանց աճյուն է հայտնաբերվել։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են