ԵՐԵՎԱՆ, 13 հունվարի – Sputnik. Որոնողափրկարարական աշխատանքների արդյունքում հունվարի 12-ին, Ջաբրայիլի, Սյունիքի և Արցախի միջանկյալ տարածքի և Ֆիզուլիի ուղղություններից հայտնաբերվել է ևս 7 զինծառայողի աճյուն: Sputnik Արմենիայի հետ զրույցում տեղեկությունը հայտնեց Արցախի արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը:
Նրա խոսքով` որոնողափրկարարական աշխատանքները կշարունակվեն նաև այսօր`Հադրութի, Թալիշի, Մարտակերտի, Մատաղիսի, Քարին տակի ուղղություններով։
«Որոնողափրկարարական աշխատանքներին մասնակցում է երեք ջոկատ, յուրաքանչյուրում ավելի քան 20 մարդ»,–նշեց Թադևոսյանը։
Ընդհանուր առմամբ, առայսօր 1229 զինծառայողի և քաղաքացիական անձանց աճյուն է հայտնաբերվել։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Առայսօր հայկական կողմի զոհերի, վիրավորների, անհետ կորածների ու գերիների թվի վերաբերյալ պաշտոնական տվյալներ չկան։
Փորձաքննության են ենթարկել 3360 մարմին ու աճյուն. Արսեն Թորոսյանը նոր թվեր է ներկայացրել
