ԵՐԵՎԱՆ, 6 փետրվարի – Sputnik. Երեկվանից Արցախի պաշտոնական շրջանակները քննարկման մեջ են դրել պարտադիր ժամկետային զինծառայության ժամկետների կրճատման հարցը, սակայն ո՛չ Հայաստանի, ո՛չ էլ Արցախի համար այս փուլում այդ մասին խոսելն իրատեսական չէ։ Facebook-ի իր էջում նման տեսակետ է հայտնել «Հենակետ» վերլուծական կենտրոնի ղեկավար, ռազմական փորձագետ, Արցախի նախագահի անվտանգության հարցերով նախկին խորհրդական Տիգրան Աբրահամյանը։ Խոսքն Արցախի զորակոչի մասին է։
«Չեմ կարծում, թե հանրության համար ականջահաճո այս տարբերակը քննարկելի է Հայաստանի կամ Արցախի համար։ Մենք չունենք ո՛չ անվտանգային համապատասխան միջավայր, ո՛չ էլ մարդկային այդպիսի ռեսուրսներ, որոնք մեզ հնարավորություն կտան ժամկետային ծառայության կրճատմանը՝ ժամանակային առումով կամ ընդհանրապես, նույնիսկ եթե մենք մեծացնում ենք պայմանագրայինների թիվը»,–նշել է Աբրահամյանը։
Նա շեշտել է, որ Զինված ուժերը վերափոխումների կարիք ունի, բայց դա պետք է լինի մասնագիտական, փորձագիտական խորքային ուսումնասիրությունների և քննարկումների արդյունքում։
