ԵՐԵՎԱՆ, 16 փետրվարի - Sputnik. ՀՀ երրորդ նախագահ Սերժ Սարգսյանն ArmNews-ին տված հարցազրույցում այսօր անդրադարձավ Շուշիի գրավմանը՝ նշելով, որ դրա մեղքը փորձ էր արվում բարդել ՀՀ պաշտպանության նախկին նախարար Սեյրան Օհանյանի վրա:
«Նոյեմբերի սկզբին ՔՊ-ական մամուլը սկսեց գրել այն մասին, թե ինչ հերոսական ջանքեր է գործադրում Սեյրան Օհանյանը Շուշին պաշտպանելու համար։ Ես զարմացա: Բայց չանցած 2-3 օր` սկսեցին Սեյրան Օհանյանին մեղադրել, որ նա չկարողացավ Շուշին պահել: Ներողություն բառիս համար՝ Շուշիի անկումն ուզում էին գցեին Սեյրան Օհանյանի ջեբը»,- ասաց Սարգսյանը:
Նրա պնդմամբ` Օհանյանն այնտեղ ընդամենը խորհրդատուի դերում է եղել:
«Ես, ունենալով այդքան կապեր, ծանոթ լինելով հարյուրավոր սպաների, գեներալների հետ, մինչև այսօր չեմ կարողանում պարզել, թե ով է եղել Շուշիի պաշտպանության հրամանատարը», - ասաց նա՝ հավելելով, որ հայտնի չէ նաև, թե ով է եղել Հադրութի ու ամբողջ այդ ճակատի հրամանատարը:
«Արգիշտի Քյարամյանը ճիշտ է ասում` Շուշիում միասին ենք եղել». Օհանյանը մանրամասներ հայտնեց
Սերժ Սարգսյանը նաև համոզմունք հայտնեց, որ Շուշին իրականում ոչ թե ընկել, այլ հանձնվել է:
«Դեռ հոկտեմբերի կեսերին, երբ որ ինձ հարցնում էին, թե երբ է պատերազմն ավարտվելու, ես միանշանակ ասում էի՝ երբ որ ադրբեջանցիները գրավեն Շուշին»,- պատմեց Սարգսյանը՝ պարզաբանելով, որ այդ մասին եզրակացություն է արել՝ վերլուծելով Ադրբեջանի ԶՈւ շարժը, Ալիևի հայտարարությունը:
«Ինձ հետ միասին 16 հոգի էլ կար». Սեյրան Օհանյանը պատմել է` իրականում ինչ էր անում Շուշիում
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
