ԵՐԵՎԱՆ, 17 մարտի – Sputnik. Այսօր առավոտյան 07:21-ին Արցախի ՆԳ նախարարության ԱԻ պետական ծառայության 911 ահազանգման կենտրոնը հաղորդում է ստացել Ճարտար քաղաքային համայնքի քաղաքապետարանում բռնկված հրդեհի մասին: Տեղեկությունը հայտնում է ԱԻ պետական ծառայությունը։
«Դեպքի վայր է մեկնել Մարտունու շրջանային արտակարգ իրավիճակների բաժնի հրշեջ փրկարարական մեկ մարտական հաշվարկ: Ամբողջությամբ այրվել է շենքի առաջին հարկի 3x4 մակերեսով աշխատասենյակներից մեկը՝ գույքով: Շենքը ծխահարվել է: Տուժածներ չկան»,– նշված է հաղորդագրության մեջ:
Հրշեջ փրկարարները ժամանակին կատարել են հրդեհաշիջման աշխատանքներ, և կրակը չի տարածվել:
Տեսչությունը ստուգումներ է իրականացնում հրդեհի բռնկման պատճառը պարզելու համար: