ԵՐԵՎԱՆ, 27 ապրիլի - Sputnik. Ռուսների խաղաղապահ զորախմբի զինծառայողները ապրիլի 26–ին ապահովել են հերթական ուխտավորների 75-հոգանոց խմբի այցը դեպի Ամարասի վանք: Տեղեկությունը հայտնում են ՌԴ պաշտպանության նախարարության մամուլի ծառայությունից:
Նշվում է, որ ուխտավորներն Ամարաս էին ժամանել Ստեփանակերտ քաղաքից և վանքի հարակից բնակավայրերից:
«Առանց ռուսաստանցի խաղաղապահների էլ մարդիկ կարող են գալ այստեղ, սակայն դա անվտանգ չէ: Խաղաղապահները միայն հանգստությունն ու խաղաղությունը չեն ապահովում, նրանք ապրում են մեզ հետ, իսկ մարդկանց հույս են տալիս, որ կյանքը նորից կսկսի ծաղկել»,- նշել է Ամարասի վանահայր տեր Գեղարդ աբեղա Հովհաննիսյանը:
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
