ԵՐԵՎԱՆ, 22 հունիսի - Sputnik․ Արցախի մարդու իրավունքների պաշտպան Գեղամ Ստեփանյանը, անդրադառնալով այսօր Ստեփանակերտի հրապարակում նախատեսված հավաքին, հայտարարել է, որ արցախյան հասարակությունը պառակտելու բոլոր փորձերն անընդունելի են։ Նա հայտարարություն է տարածել Facebook–ում։
Հունիսի 21-ին Ստեփանակերտի «Վերածննդի» հրապարակում անցկացվեց բողոքի հանրահավաք՝ նախագահ Արայիկ Հարությունյանի հրաժարականի պահանջով։ Ավարտին մասնակիցները հայտարարեցին, որ հանրահավաքը կշարունակվի հունիսի 22-ին՝ ժամը 19:00-ին։ Այսօր նաև ԱՀ նախագահ Արայիկ Հարությունյանը Facebook-ի իր էջում հայտարարեց, որ ժամը 18։00-ին հանրահավաք է կազմակերպելու և դիմելու է հանրությանը։
ՄԻՊ-ի դիտարկումներով՝ սոցիալական ցանցերում տեղեկություններ են շրջանառվում նախագահի համակիրների ու ընդդիմախոսների հնարավոր բախումների մասին, հանրության տարբեր ներկայացուցիչներ միմյանց ուղղված մեղադրական հայտարարություններ ու մեկնաբանություններ են անում։
«Մարդու իրավունքների պաշտպանը անընդունելի է համարում արցախյան հասարակությունը պառակտելու և հակադիր բևեռների բաժանելու բոլոր փորձերը` անկախ դրանց հեղինակներից, և կոչ է անում ցուցաբերել զսպվածություն, միմյանց հանդեպ հարգանք ու հանդուրժողականություն: Արցախի և արցախցու փրկությունը մեր միասնականության և համախմբվածության անբեկանելիության մեջ է, որից շեղվելու ցանկացած փորձ անընդունելի ու դատապարտելի է և հղի է անդառնալի հետևանքներով»,- նշված է ՄԻՊ հայտարարության մեջ։
Պաշտպանը դիմել է նաև հասարակական կարգը պահպանող պետական մարմիններին՝ հորդորելով գործել բացառապես օրինականության սահմաններում, ձեռնարկել հնարավոր միջոցները հավաքի բոլոր մասնակիցների իրավունքներն ու ազատությունները, կյանքն ու առողջությունը պաշտպանելու համար:
ՄԻՊ գրասենյակը տեղեկացնում է, որ հավաքի ընթացքին հետևելու համար այսօր Վերածննդի հրապարակում են լինելու նաև ՄԻՊ աշխատակազմի ներկայացուցիչներն ու անձամբ պաշտպանը։
