ԵՐԵՎԱՆ, 17 օգոստոսի – Sputnik. Ռազմամարզական կազմակերպությունների «Միություն 2015. Հաղթանակի ժառանգներ» միջազգային երիտասարդական կրթական հավաքն է անցկացվում Ծաղկաձորում:
«Ընթացիկ տարին բոլորիս համար առանձնահատուկ է, քանի որ անցկացվում է Երկրորդ համաշխարհային պատերազմում տարած Հաղթանակի 70-րդ հոբելյանի նշանի ներքո, և ինձ համար հատկապես հաճելի է, որ «Միություն 2015. Հաղթանակի ժառանգներ» ռազմամարզական երիտասարդական հավաքը նվիրված է հենց այդ նշանակալի օրվան, որն ունի համաշխարհային պատմական նշանակություն»,- երկուշաբթի հավաքի բացման հանդիսավոր արարողության ժամանակ ասաց Հայաստանի պաշտպանության նախարար Սեյրան Օհանյանը:
Ըստ նրա` որքան էլ վերջին շրջանում փոխվի վերաբերմունքը պատմական փաստերի գնահատման նկատմամբ, Երկրորդ համաշխարհայինում տարած Հաղթանակը պատմական նշանակություն ունի և միավորում է մեր ժողովուրդները հոգևոր առումով, ինչպես նաև բարոյական ուղղորդիչ է հետպատերազմյան սերունդների համար՝ դաստիարակելու նրանց ընկերության և եղբայրության ոգով.
«Սա իրապես գործող հայրենասիրական ուղղվածությամբ միջազգային ծրագիր է, որ հզոր գաղափար ու լիցք է պարունակում և միավորում է անցյալն ու ներկան: Հենց այդ պատճառով է, որ կարող ենք վստահ ասել՝ 2007 թ.-ին մեկնարկած ծրագիրը խոստումնալից ապագա ունի»,- ասաց Օհանյանը:
ԱՊՀ պետությունների պաշտպանության նախարարների խորհրդի քարտուղար Ալեքսանդր Սինայսկին իր հերթին նշեց, որ հավաքի մասնակիցներին մեծ պատիվ է վերապահված` ներկայացնելու իրենց պետությունների ազգային շահերը: Նա մասնակիցներին մաղթեց հասնել ընդհանուր հաղթանակի` ի բարօրություն Անկախ պետությունների համագործակցության:
Հայրենական մեծ պատերազմում խորհրդային ժողովրդի հաղթանակի 70-ամյակին նվիրված «Միություն 2015. Հաղթանակի ժառանգներ» միջազգային երիտասարդական հավաքն անցկացվում է Ծաղկաձորում:
Հավաքին մասնակցում են ավելի քան 500 պատանիներ 14 երկրներից` Հայաստանից, Բելառուսից, Վրաստանից, Ղազախստանից, Ղրղըզստանից, Լատվիայից, Լիտվայից, Մոլդովայից, Մերձդնեստրից, ԼՂՀ–ից, Ռուսաստանից, Տաջիկստանից, Ուկրաինայից և Էստոնիայից։
Հայաստանից մասնակցում է չորս թիմ, ևս մեկ թիմ` Ղարաբաղից:
Հավաքի կազմակերպիչներն են Հայաստանի պաշտպանության նախարարությունը, Հայրենիքի պաշտպանների աջակցման տարածաշրջանային «Հայրենիքի սխրանք» հասարակական շարժումը (Ռուսաստան), զինվորական բազմամարտի միջտարածաշրջանային «Ռուս» ֆեդերացիան (Ռուսաստան)։
Հավաքն անցկացվում է Հայաստանի պաշտպանության նախարար Սեյրան Օհանյանի հովանու ներքո և պաշտպանության նախարարի առաջին տեղակալ Դավիթ Տոնոյանի ընդհանուր ղեկավարությամբ։
Թիմերից յուրաքանչյուրը բաղկացած է երկու ղեկավարից և 14-17 տարեկան տասը մասնակցից` ռազմամարզական ակումբների, ռազմական վարժարանների, կադետական կորպուսի, ռազմամարզական թեքումով գիշերօթիկ դպրոցների սաներից։
«Միություն. Հաղթանակի ժառանգներ» հավաքն անցկացվում է 2007 թվականից երկու մակարդակներով` միջազգային և համառուսաստանյան։ 2013 թվականին միջազգային հավաքներն անցկացվել են Օդեսայում, 2014–ին` Ղրղըզստանում, որտեղ Մոնթե Մելքոնյանի անվան վարժարանի սաները լավագույներններից են եղել։
Միջոցառման շրջանակում կանցկացվեն մրցումներ 18 սպորտաձևերից և 29 վարպետության դասեր։
