Շաբաթվա մարդիկ. երբ մանկական երազանքները մասամբ իրականանում են

Արսեն Նավասարդի
Ավարտել է թատրոնի և կինոյի պետական ինստիտուտի բեմանկարչության ֆակուլտետը։
«Երբ փոքր էի, ցանկանում էի քահանա դառնալ»:
Ապագան տեսնում է ավելի կիրթ հասարակության մեջ:

Մարիա Մաթևոսյան
Մասնագիտությամբ նկարիչ է, քանդակագործ։ Ւնը տարի է՝ շեֆ խոհարար է։
«Երբեք չեմ մտածել, թե ինչ կուզեի դառնալ։ Ես մտածել եմ, թե ինչ կուզեի անել։ Ուզում էի կերակրել կարիքավորներին»։
Ապագայում ուզում է հարազատ հոգու հետ ապրել՝ բնությանը մոտ:
«Ինձ համար կյանքում կարևորը սերն է»,– ասում է նա։

Սևակ Անախասյան
Մասնագիտությամբ գրաֆիկ դիզայներ է: 2012 թ-ից աշխատում է դիզայնի ոլորտում:
«Երբ փոքր էի, ուզում էի պլաստիկ վիրաբույժ դառնալ»:
Ապագայում ցանկանում է լրջորեն զբաղվել կոշիկի դիզայնով ու դուրս գալ միջազգային շուկա:

Լիանա Դանիելյան
Մասնագիտությամբ լեզվաբան–թարգմանիչ է, թեև այդ մասնագիտությամբ աշխատելու քիչ փորձ ունի, փոխարենը զբաղվում է մարքեթինգով։ Արդեն 7 տարի աշխատում է «Մայթրոսոֆթ» ընկերության հայաստանյան ներկայացուցչությունում։
«Փոքր տարիքում շատ էի ուզում սեփական դպրոցը բացել, որտեղ ուսուցման համակարգը կտարբերվեր մերինից։ Հիմա հասկանում եմ, որ երազում է մի դպրոցի մասին, որտեղ կկիրառվի պրակտիկ, ինտերակտիվ մեթոդաբանություն, և որ ամենակարևորը` որտեղ փոքր տարիքից խրախուսվում ու զարգանում են սովորողների անհատական ունակությունները»։

Տիգրան Թոփչյան
Մասնագիտությամբ մաթեմատիկոս է։ Ավարտել է ԵՊՀ ինֆորմատիկայի և կիրառական մաթեմատիկայի ֆակուլտետը։ Սեփական ընկերությունն ունի։ Փոքրուց սիրել և հիմա էլ շարունակում է սիրել տեխնիկան ու «Լեգո» կոնստրուկտորները։
«Փոքր տարիքում ուզում էի բանկիր դառնալ»։
Ապագայում ինչով էլ զբաղվի, կուզեր, որ միշտ առաջ գնա։

Սոնա Սումբատյան
Մասնագիտությամբ տնտեսագետ է։ Ավարտել է Երևանի պետական տնտեսագիտական ինստիտուտը։ Համարյա 14 տարի է` ապրում է Մոսկվայում։ 13 տարի դասավանդում է Կառավարման պետական համալսարանում։ Տնտեսական գիտությունների թեկնածու է, դոցենտ։
«Փոքր ժամանակ երազում էի բալետի պարուհի դառնալ։ Կատարյալ ապագան սա կլինի` ես ապրեմ Երևանում` երեխաներով շրջապատված, լիաթոք վայելելով երջանկությունը»։

Անուշ Պետրոսյան
Մասնագիտությամբ գերմանագետ է և հոգեբան։
2007 թ-ին ավարտել է Երևանի Վ. Բրյուսովի անվան պետական լեզվաբանական համալսարանի գերմաներեն լեզվի և հոգեբանության ֆակուլտետը: Մի քանի տարի աշխատել է որպես լրագրող՝ տարբեր լրատվամիջոցներում։ Շուրջ 2 տարի է` ապրում է Գերմանիայում և գերմաներեն դասավանդում դպրոցում:
«Երբ փոքր էի, երազում էի բժիշկ կամ երգչուհի դառնալ։ Մասնակիորեն իրականացավ երազանքս. հոգեբանությունն ինչ-որ չափով բժշկություն է, իսկ երգն ինձ հետ է ամենուր` անգամ դասավանդման պրոցեսում»։
Ապագայում երազում է ստեղծել լեզուների ուսուցման կենտրոն, ուր երեխաներին օտար լեզուներ կուսուցանի սեփական մեթոդաբանությամբ։