Շաբաթվա մարդիկ. Հետաքրքիր երազանքներ, տարօրինակ իրականություն

Վիկտորյա Մելոյան

Ավարտել է ԵՊԲՀ ընդհանուր բժշկական գործ ֆակուլտետը, սրտաբանության կլինիկական օրդինատոր է Էրեբունի ԲԿ-ում: Վերջերս menu.am-ում ֆուդբլոգերությամբ է սկսել զբաղվել:

-Երբ փոքի էի, ցանկանում էի Հոգվարթսի կախարդ կամ պաղպաղակ վաճառող լինել, որովհետև համոզված էի, որ իրենք անսահման քանակությամբ պաղպաղակ են ուտում:

Ապագայում ջանք չի խնայելու ընտիր բժիշկ դառնալու համար, ցանկանում է հաճախ ճամփորդել, Դեյվիդ Լինչին հանդիպել, խոշոր աճուրդների մասնակցել ու սիրած արտիստների մի քանի գործ գնել:

Քիանուշ Փույան

Պարսիկ զբոսաշրջիկ է, ուսանել է Լոնդոնում:

- Երբ փոքր էի, ջութակ էի նվագում ու երազում երաժիշտ լինելու մասին:

Ապագայում ցանկանում է սեփական բիզնես ունենալ:

Էդուարդ Աղաջանյան

Ֆինանսիստ է, ավարտել է Մոնակոյի միջազգային համալսարանը: B4 ակումբի հիմնադիրն է, դիջեյ է, ինչպես նաև Երևանի քաղաքապետարանում ավագանու անդամ:

-Երբ փոքր էի, ուզում էի ֆուտբոլիստ կամ թենիսիստ դառնալ:

Ապագայում ցանկանում է Հայաստանում ֆինանսական ակտիվների կառավարման ֆոնդ հիմնել:

Ռուզան Ապրեսյան

Ավարտել է ԵՊՀ ժուռնալիստիկայի ֆակուլտետը, ապա սովորել է նույն համալսարանի սոցիոլոգիայի ֆակուլտետում: Մոտ 8 տարի է՝ հաղորդակցության մասնագետ է:

-Երբ փոքր էի, ցանկանում էի բալետի պարուհի դառնալ:

Ապագայում ուզում է հնարավորինս շատ ճանապարհորդել:

Հակոբ Բաչաչյան

Հալեպում ուսանել է նկարչական ակադեմիայում, ապա սովորել է վարսավիրական գործ: Շուրջ 11 տարի է, ինչ տղամարդկանց վարսավիր է:

-Երբ փոքր էի, ցանկանում էի ծաղրանկարիչ դառնալ:

Ապագայում ցանկանում է իր սեփական գեղեցկության սրահների ցանցն ունենալ և մազերի խնամքի համար նյութեր արտադրել:

Իննա Մկրտչյան

2007 թ-ին ավարտել է Մոսկվայի պետական համալսարանի երևանյան մասնաճյուղի սերվիսի և տուրիզմի ֆակուլտետը: Շուրջ 2 տարի է, ինչ ռադիոհաղորդավար և նախագծերի մենեջեր է ռադիո Վանում: Բացի այդ, երգերի խոսքերի հեղինակ է:

-Երբ փոքր էի, ցանկանում է երգչուհի կամ դերասանուհի դառնալ:

Ապագայում ուզում է միջազգային ճանաչում ունեցող աստղերի համար երգեր գրել:

Իրինա Սլուցկայա

Ռուս գեղասահորդուհի է, 2002թ-ի օլիմպիական խաղերի արծաթե, 2006թ-ի օլիմպիական խաղերի բրոնզե մեդալակիր, աշխարհի կրկնակի չեմպիոն, Եվրոպայի յոթակի չեմպիոն: Այժմ Մոսկվայի շրջանային Դումայի պատգամավոր է «Միասնական Ռուսաստան» կուսակցությունից:

-Երբ փոքր էի, ցանկանում էի վիրաբույժ դառնալ: