ԵՐԵՎԱՆ, 9 փետրվարի — Sputnik. Այսօր` ժամը 11:00-ի սահմանում, Գյումրու Մարմաշեն խճուղում գտնվող «Գարուն» ռեստորանային համալիրի տարածքում տղամարդու և կնոջ դիակներ են հայտնաբերել։ Այս մասին հայտնում է Sputnik Արմենիայի թղթակիցը Գյումրիից։
«Երեկ` ժամը 13։00-14։00-ի սահմանում, երիտասարդը պատվիրել է հյուրանոցային համարներից մեկը, որը նաև ավտոտնակ ունի»,- Sputnik Արմենիային ասաց ռեստորանի տնօրեն Սեյրան Գևորգյանը։
Առավոտյան 11-ի սահմանում հյուրանոցի ադմինիստրատորը ավտոտնակում հայտնաբերել է նրանց դիակները։ Նրանցից մեկը սենյակը պատվիրած Դավիթ Մարտիրոսյանն է` մոտ 30 տարեկան։ Կինը Գյումրու բնակիչ է՝ 1990 թ-ին ծնված Քրիստինե Շ.-ն:
Ներկա պահին դեպքի վայրում աշխատում են ոստիկաններն ու քննիչները։
Նշենք, որ այսօր նմանատիպ դեպք էր գրանցվել նաև Երևանում։ Ժամը 00։30-ի սահմաններում քաղաքացիներն ահազանգել էին Ոստիկանության Մալաթիայի բաժին և հայտնել, որ Իսակով 38 շենքի հարևանությամբ գտնվող ավտոտնակում՝ ավտոմեքենայի մեջ, դիակներ կան։
Դեպքի վայր ժամանած ոստիկաններն ու քննիչները նշված ավտոտնակում կայանած Opel մակնիշի ավտոմեքենայում հայտնաբերել էին 39-ամյա Հակոբ Վ.-ի և 41-ամյա Լուսինե Ա.-ի դիակները։
Դատաբժշկի նախնական եզրակացության համաձայն՝ նրանք մահացել են շմոլ գազից։