23:57 18 օգոստոսի 2017
Ուղիղ եթեր
Էդուարդ Շարմազանով

Փոխխոսնակը Սարգսյան–Ալիև հանդիպման մասին. Ցանկացած բանակցություն հրաձգությունից լավ է

© Sputnik/ Asatur Yesayants
Քաղաքականություն
Ստանալ կարճ հղումը
33 0 0

Շարմազանովը չի բացառում, որ Լեռնային Ղարաբաղի հարցով բանակցությունները կվերսկսվեն

ԵՐԵՎԱՆ, 14 հունիսի — Sputnik. Ղարաբաղյան հակամարտության հարցով բանակցությունների վերսկսումը Պետերբուրգում Հայաստանի և Ադրբեջանի նախագահների հանդիպումից հետո չի բացառվում, Sputnik Արմենիային ասաց ԱԺ փոխխոսնակ Էդուարդ Շարմազանովը։ 

Ավելի վաղ ՌԴ նախագահի օգնական Յուրի Ուշակովը հայտնել էր, որ Ռուսաստանի նախագահ Վլադիմիր Պուտինը հունիսի 20-ին Պետերբուրգում առանձին հանդիպումներ կունենա Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հետ, այնուհետև Ղարաբաղի հարցով եռակողմ հանդիպում տեղի կունենա։

«Մեր մոտեցումները հստակ են և համահունչ են ԵԱՀԿ ՄԽ համանախագահների հայտարարություններին։ Վիեննայի հայտարարությունը լիովին համահունչ է Հայաստանի նախագահի ապրիլյան թեզիսներին։ Եթե որևէ բան փոխվի (հանդիպման ընթացքում), դա կլինի բանակցությունների վերսկսում», — ասաց Շարմազանովը։

Համենայն դեպս, նրա խոսքով, ցանկացած հանդիպում ավելի լավ է, քան միմյանց վրա կրակելը։ Շարմազանովն ընդգծեց, որ ցանկացած, նույնիսկ վատ խաղաղությունը լավ պատերազմից ավելի լավ է։

Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։

Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։

Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։

Գլխավոր թեմաներ