Եռակողմ ձևաչափով հանդիպումներ սկսել են իրականացվել դեռ 2008 թվականից, երբ դրանց նախաձեռնողը ռուսական կողմն էր` նախագահ Դմիտրի Մեդվեդևի գլխավորությամբ։ Մինչ այժմ հակամարտության հանգուցալուծմանն ուղղված բանակցությունները լուրջ արդյունքներ չեն տվել, սակայն որոշ պայմանավորվածություններ եղել են։
2008 թվականին մերձմոսկովյան Մայնդորֆում հանդիպման ժամանակ հռչակագիր ստորագրվեց, որի համաձայն` կողմերը պարտավորվում էին հակամարտությունը լուծել խաղաղ ճանապարհով։ 2010 թ. Աստրախանում Հայաստանի և Ադրբեջանի նախագահները համաձայնել են գերիների փոխանակում և զոհվածների աճյունների վերադարձ իրականացնել։
Հատկանշական էր երկու նախագահների հանդիպումը Կազանում 2011-ին, երբ թվում էր, որ կողմերը համաձայնության են եկել «Հիմնարար սկզբունքների» վերաբերյալ և փաստաթուղթ ստորագրելու հնարավորություն կա, սակայն վերջին պահին Ադրբեջանը հրաժարվեց ստորագրումից` առաջարկելով 10 նոր առաջարկ։
Հետագայում հանդիպումները տեղի են ունեցել ամեն տարի, այդ թվում` 2012թ.-ի հունվարին Սոչիում, 2013թ.-ին` Վիեննայում, 2014թ.-ին` Սոչիում, 2015թ.-ին` Բեռնում։ Սակայն զգալի արդյունքների չեն հանգեցրել։
Սարգսյան-Ալիև նախավերջին և ապրիլի սկզբին ղարաբաղյան հակամարտության թեժացումից հետո առաջին հանդիպումը տեղի է ունեցել 2016թ.-ի մայիսի 16-ին Վիեննայում` ղարաբաղյան հակամարտության կարգավորման հարցով ԵԱՀԿ Մինսկի խմբի համանախագահների միջնորդությամբ (Ռուսաստան, Ֆրանսիա, ԱՄՆ)։
Հենց Վիեննայում է ձեռք բերվել պայմանավորվածություն` հրադադարի մասին պայմանավորվածություններն (1994թ.) անհապաղ կատարելու և հրադադարի ռեժիմը ամրապնդելու (1995թ.) մասին։ Կողմերը համաձայնել են, որ անհրաժեշտ է անցկացնել մոնիտորինգ և հետաքննության մեխանիզմների ներդնել ԵԱՀԿ մշտական ներկայացուցչի թիմի լիազորությունների շրջանակում։
Պուտին-Սարգսյան-Ալիև վերջին եռակողմ հանդիպումը տեղի է ունեցել Սանկտ Պետերբուրգում։
