ԵՐԵՎԱՆ, 14 դեկտեմբերի — Sputnik. Իրենց եկամուտները խելամիտ կերպով չհիմնավորող պաշտոնյաները կարող են ենթարկվել քրեական պատասխանատվության: Այդ նպատակով ՀՀ կառավարությունն առաջարկում է քրեական օրենսգրքում նոր հոդված ավելացնել:
Այսինքն՝ եթե պաշտոնյան հայտարարագրել է եկամուտ, որը չի կարողացել պատշաճ կերպով հիմնավորել, կենթարկվի քրեական պատասխանատվության:
Այս նոր հանցատեսակի համար պաշտոնյաները կենթարկվեն 3-6 տարվա ազատազրկման. 3-6 տարի ժամկետով` որոշակի պաշտոններ զբաղեցնելու իրավունքից զրկելով, կամ 3 տարի ժամկետով` գույքի բռնագրավմամբ:
Իսկ որպեսզի պաշտոնյայի եկամուտները որակվեն իբրև ապօրինի հարստացում, դրանք պետք է լինեն 5 մլն դրամից ավելի:
Ապօրինի եկամուտները չափի հետ պատգամավոր Էդմոն Մարուքյանը համաձայն չէ, նա կարծիք հայտնեց, որ 5 մլն դրամը բավական մեծ չափ է, ասենք, կաշառքի համար:
«Ապօրինի հարստացման հոդվածով մինչև 5 մլն դրամի դեպքում չեն պատժվի»,- պատասխանելով պատգամավորի բարձրացրած հարցին, ասաց արդարադատության նախարար Արփինե Հովհաննիսյանը,- «բայց դա չի նշանակում, որ պաշտոնատար անձը կվրիպի իրավասու մարմինների ուշադրությունից»:
Ապօրինի է հարստացել տվյալ պաշտոնյան, թե ոչ, քննելու և ապացուցելու են քննչական կոմիտեի աշխատակիցները, իսկ պաշտոնյան կարող է օգտվել իր սահմանադրական իրավունքից և լռություն պահպանել, կամ բերել հակառակն ապացուցող հիմնավորումներ:
Պատգամավոր Հովհաննես Մարգարյանն էլ առաջարկեց օրենքին հետադարձ ուժ տալ, որպեսզի նախկինում ապօրինի հարստացած պաշտոնյաները ևս պատժվեն:
«Կարծում եմ օրենքը պետք է հետադարձ ուժ ստանա, որովհետև ինչ կար չկար արդեն ապօրինի թալանեցին, տարան երկրից»,- ասաց ՕԵԿ խմբակցության պատգամավորը,- «29 միլիարդից ավելի ՀՀ ունեցվածքը գրանցված է արտերկրում, երբ մեր բյուջեն 2.7 մլրդ է: Եթե մենք ուզում ենք իրականում գործ անենք, պետք է ուղիներ գտնենք, որ այն ամենը, ինչ ժամանակին թալանել, տարել են՝ վերադարձվի»:
Արփինե Հովհաննիսյանը պատգամավորի առաջարկը չընդունեց` նշելով, որ ՀՀ Սահմանադրության համաձայն, խստացվող օրենքը հետադարձ ուժ ունենալ չի կարող:
Պաշտոնյաները շատ հաճախ իրենց անբացատրելի հարստացումը մեկնաբանում են նաև փոխառություններով, կամ ԲՀԿ խմբակցության ղեկավար Նաիրա Զոհրաբյանի բնորոշմամբ` «տոկոսով փող տալով»:
«Մեր բոլոր պաշտոնյաները տոկոսով փող տվող են»,- ասաց Նաիրա Զոհրաբյանը` առաջարկելով պաշտոնատար անձանց օրենքով արգելել փոխառություններ տրամադրելը:
Պատգամավորի այս առաջարկը արդարադատության նախարարը ևս մերժեց` նշելով, որ փոխառությունը ոչ միայն տոկոսով գումար տալն է, այլև ավանդները, վարկերը և այլ օրինական գործողություններ, որոնք արգելել հնարավոր չէ:
