ԵՐԵՎԱՆ, 17 հունվարի — Sputnik. Սեյրան Օհանյանը դիմել է հայրենակիցներին, մարտական, զինակից և գաղափարակից ընկերներին և տեղեկացրել, որ շարունակում է քաղաքական խորհրդակցությունները կուսակցությունների, հասարակական կառույցների, հայտնի գործիչների, մտավորականների հետ:
Նրա խոսքով` ձևավորվում է համախոհների թիմ՝ միաձույլ դաշինք, որը հանրությանը կներկայացնի իրատեսական ծրագիր և մեր երկիրը ստեղծված իրավիճակից դուրս բերելու ճանապարհային քարտեզ:
«Միասնության շնորհիվ ստեղծված, արդարության պայմաններում հաստատված վստահության ալիքը հնարավորություն կտա ոչ թե շրջանցելու կնճռոտ հարցերը, այլ ընդառաջ գնալու և համարձակ քայլերով դրանց լուծումներ տալու»,- գրել է Սեյրան Օհանյանը:
Ըստ նրա` հանրությունը սպասում է փոփոխությունների, և պատասխանատու մարդիկ պետք է բավարարեն հանրության՝ փոփոխությունների ձգտելու պահանջը:
«Իմ ունեցած քննարկումները եզրափակիչ փուլում են, և այսօր ես տալիս եմ հենց այդ փուլի մեկնարկը»,- նշել է Օհանյանը:
Նշենք, որ երեկ Արթուր Ալեքսանյանը, բոլորին առավել հայտնի` Ամարասի Արթուրը, հայտարարել է, որ ընտրություններում աջակցելու է Սեյրան Օհանյանին, անկախ նրանից, թե ինչ ձևաչափով հանդես կգա պաշտպանության նախկին նախարարը։
