ԵՐԵՎԱՆ, 17 փետրվարի — Sputnik. Հայաստանում քվեարկության երկու տարբերակ կա, որոնցից մեկը սպառնում է Հայաստանի գոյությանը: Այսօր Sputnik Արմենիա մամուլի կենտրոնում լրագրողների հետ հանդիպմանն ասաց «Հայկական վերածնունդ» կուսակցության փոխնախագահ Մհեր Շահգելդյանը:
«Կա քվեարկության երկու տարբերակ. մեկը, երբ ոտքերով են քվեարկում, թողնում-գնում են երկրից, երկիրը դատարկվում է: Մյուսը՝ քվեարկում են ընտրատեղամասերում՝ փորձելով ձևավորել իրենց ապագան: Սա մի լրջագույն խնդիր է: Եթե ոտքերով քվեարկությունը շարունակվեց, Հայաստան չի մնա»,- ասաց Շահգելդյանը:
Միայն վերջին 2-3 տարում արտագաղթի հետևանքով աշխատունակ բնակչության թիվը Հայաստանում նվազել է 4.8%-ով՝ վկայակոչելով պաշտոնական վիճակագրության տվյալները, նշեց Շահգելդյանը: Փոխարենը՝ հայերը վերջին տարիներին միայն Ռուսաստանում 1 մլն նոր աշխատատեղ են ստեղծել:
Ինչ վերաբերում է ընտրակաշառքներին, Մհեր Շահգելդյանը համոզված է՝ նույնիսկ նրանք, ովքեր գումար են վերցնելու, չեն քվեարկելու գումար բաժանողների օգտին: Եվ ոչ միայն այն պատճառով, որ բարձրացել է ընտրողի իրավագիտակցությունը, այլև որովհետև ընտրողն իր ապագան չի կապում այսօր գումար բաժանող քաղաքական ուժի հետ:
Ըստ նրա` համամասնական ցուցակներով կուսակցությունները փորձում են քիչ թե շատ ներկայացուցչական լինել, իսկ ռեյտինգային ցուցակներով ԱԺ են գալիս նույն օլիգարխներն ու թաղային հեղինակությունները: Ռեյտինգային ընտրակարգն այս առումով, Մհեր Շահգելդյանի խոսքով, նոր ընտրական օրենսգրքում փոխարինել են նախկինում գործող մեծամասնական ընտրակարգը:
«Բազմաթիվ օլիգարխներ, հեղինակություններ, թաղի տղերք առաջադրվել են, և արդեն սկսվել է փողի մրցավազքը: Սա լուրջ խնդիր է լինելու այս ընտրությունների համար»,- ասաց Շահգելդյանը:
«Հայկական վերածնունդի» փոխնախագահը համոզված է` երկրի ապագա խորհրդարանը պետք է ձևավորվի քաղաքական ուժերի և քաղաքական գործիչների հենքի վրա:
