ԵՐԵՎԱՆ, 27 փետրվարի — Sputnik. Հանրապետական կուսակցությունն ԱԺ առաջիկա ընտրություններում քաղաքական ուժերից ոչ մեկին մրցակից չի համարում: Այսօր Sputnik Արմենիա մամուլի կենտրոնում լրագրողների հետ հանդիպման ժամանակ ասաց ՀՀԿ փոխնախագահ Արմեն Աշոտյանը: Նրա խոսքով` ՀՀԿ-ի միակ մրցակիցը Հայաստանի չլուծված խնդիրներն են:
«Ակնհայտ է, որ ոչ իշխանական բոլոր ուժերն էլ կցանկանան, որ ՀՀԿ-ն իրենց դիտարկի որպես հիմնական մրցակից: Դա կբյուրեղացնի իրենց կերպարը ընդդիմադիր դաշտում և թույլ կտա լրացուցիչ էլեկտորատ բերել: Մենք ոչ մեկին թիվ մեկ թիրախ չենք ճանաչում, չենք ճանաչում ոչ մեկին թիվ մեկ մրցակից: Մեր առաջին և վերջին մրցակիցը Հայաստանի չլուծված խնդիրի փաթեթն է»,- ասաց ՀՀԿ փոխնախագահը:
Նախընտրական շրջանում ՀՀԿ որոշ ռեյտինգային թեկնածուների միջև արդեն իսկ գրանցված միջադեպերը Արմեն Աշոտյանը թեև բնական գործընթաց է համարում, բայց և նշում է, որ Հանրապետականը ձգտելու է ձերբազատվել ընտրությունները ստվերող բոլոր միջադեպերից:
Ռեյտինգային ընտրակարգով առաջադրված այն թեկնածուները, որոնք հասարակության կողմից դրական չեն ընկալվում, Աշոտյանի համոզմամբ, ՀՀԿ-ի վարկանիշը չեն ստվերի: Այդ կապակցությամբ նա իր որոշ կուսակիցներին համեմատեց ԱՄՆ նախագահ Դոնալդ Թրամփի հետ՝ լրագրողներին կոչ անելով չքննադատել ընտրողի քվեն ստացողներին:
«Նրան կարող են չսիրել, քննադատել, բայց այդ մարդն ընտրված նախագահ է: Նույնը պետք է լինի նաև այն թեկնածուների պարագայում, որոնք կստանան իրենց ընտրողների հավանությունը: Մենք գիտենք ումով ենք գնում, ՀՀԿ-ն մեծ օրգանիզմ է, մենք շատ տարբեր ենք՝ մեր ակադեմիական ցենզով, աշխարհայացքով, բայց միասնական ենք շատ կարևոր հարցերում: Ես վստահ եմ, որ ՀՀԿ բոլոր թեկնածուները՝ և՛ համապետական, և՛ ռեյտինգային, ի վիճակի են պայքարել ու վաստակել հանրության քվեն»,- ասաց Աշոտյանը:
Հանրապետականն ընտրություններին գնում է ՙԱնվտանգություն և առաջընթաց կարգախոսով և, Աշոտյանի բնորոշմամբ, երկու հիմնական կերպարով: Անվտանգության խորհրդանիշը ՀՀ նախագահ Սերժ Սարգսյանն է, առաջընթացինը՝ վարչապետ Կարեն Կարապետյանը:
Ի դեպ, Աշոտյանը ևս մեկ անգամ շեշտեց` ապրիլի 2-ից հետո, ՀՀԿ-ի հաղթանակի դեպքում Կարեն Կարապետյանը կշարունակի ղեկավարել Հայաստանի գործադիր իշխանությունը:
