ԵՐԵՎԱՆ, 1 մարտի — Sputnik. ՀՀԿ-ն առաջիկա խորհրդարանական ընտրությունների ֆավորիտն է, լրագրողներին ասաց ԱԺ փոխխոսնակ, ՀՀԿ մամուլի քարտուղար Էդուարդ Շարմազանովը։
«Հասարակական կարծիքի ուսումնասիրմանն ուղղված բազմաթիվ հարցումները ցույց են տալիս, որ բոլոր 13 ընտրատարածքներում էլ առաջատար է ՀՀԿ-ն», — նշեց Շարմազանովը։
Մեկնաբանելով իր կուսակից գործընկերոջ Կարեն Կարապետյանի (հայտնի գործարար Սամվել Կարապետյանի եղբայր)հայտարարությունը, ըստ որի`ՀՀԿ-ին անդամակցելը խանգարելու է ընտրություններին, Շարմազանովը նշեց, որ ՀՀԿ-ական լինելն անձամբ իր համար պատիվ ու հպարտություն է, և նրա կարծիքով` բոլորի համար դա պիտի լինի պատիվ ու հպարտություն։
Շարմազանովը նաև նշեց, որ ՀՀԿ-ում քննարկումներ են անցկացվում բոլոր կարևոր հարցերի շուրջ (այդ թվում` նոր ընտրական օրենսգրքի վերաբերյալ), և կարծիքները հաճախ չեն համընկնում։ Կարապետյանն այն մարդկանցից է, որոնք չեն կիսում մեծամասնության տեսակետը։
Հայաստանում խորհրդարանական ընտրություններն անցկացվելու են ապրիլի 2-ին։
