ԵՐԵՎԱՆ, 5 մայիսի — Sputnik. ԱԺ 6-րդ գումարման պատգամավորներն այսօր ԿԸՀ նախագահ Տիգրան Մուկուչյանից ստացան իրեն պատգամավորական մանդատները:
Նոր ձևավորված խորհրդարանի բոլոր չորս խմբակցությունները ներկա էին մանդատների հանձնման պաշտոնական արարողությանը, բայց ոչ ամբողջական կազմով:
Ամբողջ կազմով էր ներկայացել միայն ամենափոքրաթիվ՝ ՀՅԴ խմբակցությունը. 7 պատգամավորներից Աղվան Վարդանյանը Sputnik Արմենիայի հետ զրույցում նշեց, որ արդեն երրորդ անգամ է պատգամավորական մանդատ ստանում:
«Հաճելի աշխատանք է,- կեսլուրջ-կեսկատակ ավելացրեց նա:
Կոալիցիոն հուշագրի մասին հարցին ի պատասխան Վարդանյանը չցանկացավ մանրամասնել ՀՀԿ-ի հետ ձեռք բերված պայմանավորվածությունները՝ խորհուրդ տալով մի փոքր սպասել:
9 պատգամավորական մանդատ ստացած «Ելք» դաշինքը պաշտոնական արարողությանը ներկայացել էր մեկ անձով:
Sputnik Արմենիայի հետ զրույցում «Հայկական ժամանակ» թերթի լրագրող Վահագն Հովակիմյանը նշեց, որ խորհրդարանականների միջավայրում իրեն օտար չի զգում, բայց և անբացատրելի զգացում ունի, որն ունեցել է նաև որպես լրագրող ԱԺ-ում աշխատելիս:
«Ելք» դաշինքի բոլոր 9 մանդատները ստանալու պարտականությունն ինքն է կամավոր ստանձնել՝ որպես լիազոր ներկայացուցիչ:
«Ծառուկյան» դաշինքի 30 պատգամավորներից ներկա էին մի քանի պատգամավորներ: Դաշինքի առաջնորդ Գագիկ Ծառուկյանը չէր ներկայացել: Խմբակցության պատգամավոր Միքայել Մելքումյանը լրագրողների հետ զրույցում անդրադարձավ դաշինքում մանդատների շուրջ բարձրացած աղմուկին՝ նշելով, որ «խախտվել են պայմանավորվածությունները»:
«Թե՛ քաղաքական, թե՛ մարդկային պայմանավորվածությունները խախտվել են: Հիմա պետք է դրանք շտկվեն, վերաիմաստավորվեն, պետք է արագ վերլուծել, թե որտեղ, ինչն է խախտվել, որպեսզի երկրորդ անգամ նույնպես սխալները չկրկնվեն»,- ասաց Մելքումյանը:
Դաշինքի՝ ինքնաբացարկի դիմում ներկայացրած, ապա դրանից հրաժարված պատգամավորներից ոչ ոք այսօր մանդատ ստանալու չէր ներկայացել:
ՀՀԿ-ն ներկայացել էր գրեթե ամբողջ կազմով: ԱԺ պատգամավոր ընտրված Արմեն Աշոտյանը լրագրողներին խոստովանեց, որ կարոտել է Ազգային ժողովը:
«Շատ եմ սիրում ԱԺ-ն, սիրում եմ այդ ինստիտուտը, սիրում եմ դահլիճը, ամբիոնը, բոլոր միկրոֆոնները: Կարծում եմ՝ նոր խորհրդարանի կազմը խոստումնալից է՝ որպես հասարակական-քաղաքական տրամադրությունների հայելի»,- ասաց Աշոտյանը:
