ԵՐԵՎԱՆ, 15 մայիսի-Sputnik. «Ելք» դաշինքին հաջողվել է արձանագրել իր օգտին տրված յուրաքանչյուր քվե: Այս մասին հայտնեց Էդմոն Մարուքյանը: Ի հավելումն ասվածի` Նիկոլ Փաշինյանն ասաց, որ ՀՀԿ-ից 1000 ձայն գնացել է իրենց օգտին։ Դա նրանք պարզել են կարմիր գրիչների առկայության արդյունքում։
«Համախոհների հսկայական բանակն ավելանում է։ Մենք մեր ընտրողին ճանաչում ենք։ Նա մեր գործունեությանը հավանություն է տվել։ Եթե հաշվի առնենք, որ ՀՀԿ ընտրողներից 1000 մարդ պակասել է, մեր օգտին` նույնքան ավելացել, կարող ենք ասել, որ նրանց ձայներից եկել են մեզ։ Տեղամասերից մենք ունենք քվեաթերթիկներ կարմիր գրիչով քվեարկած մեր օգտին»,-ասաց նա։
Չնայած ընտրության արդյունքին` «Ելք» դաշինքը շնորհակալություն է հայտնում բոլոր ընտրողներին։
«Մենք ուզում էինք հաղթել Երևանի քաղաքապետի ընտրություններում, բայց չկարողացանք։ Հիմա մենք մտել ենք մի պրոցեսի մեջ, երբ «Ելք» դաշինքի ազդեցությունը քաղաքական կյանքում ֆիքսվեց, մեծացավ ու շարունակելու է մեծանալ։ Առաջիկա տարիներին քաղաքական հիմնական տրենդը լինելու է դաշինքի ազդեցությունը ՀՀ քաղաքական կյանքում»,-ասաց Փաշինյանը։
Նա խոսեց նաև հետընտրական պրոցեսներից` հայտարարելով, որ ցույցեր ու հանրահավաքներ չեն նախապատրաստում։
«Այսքան մարդ ընտրակաշառք է վերցրել ու գնացել ընտրության։ Մենք ինչ ենք արձանագրում, եթե հետընտրական պրոցես սկսենք, այդ ընտրակաշառք վերցրած քաղաքացին գա՞լու է Ազատության հրապարակ։ Եթե նրան 10 հազար դրամով տարել են ընտրատեղամաս, 10 հազար դրամով էլ հրապարակից տանելու են տուն։ Մենք փուստ կրակոցների իրավունք չունենք»,-ասաց նա։
Փաշինյանի խոսքով` իր խնդիրն է հուսահատության փոսից դուրս բերելը։ Նա շեշտեց, որ դրա համար իրենց պետք է աջակցություն։
«Երևանում և Հայաստանում մենք ունենք աջակցություն, պիտի դա փայփայենք ու վերածենք արդյունքների։ Մենք այս ուղղությամբ ենք աշխատելու»,-ասաց նա։
ԱԺ-ում դաշինքի գործունեության մասին էլ խոսեց Էդմոն Մարուքյանը։ Նա հայտնեց, որ առաջիկա երկու օրերին կսկսեն պատրաստվել խորհրդարանական անդրանիկ նիստին։
«Ցանկացած որոշում, որ կայացնենք, մամուլին կհայտնենք»,-ասաց նա։
Վերջում բանախոսներն անդրադարձան Զարուհի Փոստանջյանի ու նրա դստեր հետ կապված միջադեպին, հայտնեցին, որ դատապարտում են եղելությունը և ոստիկանության գործողությունները համարում են ոչ իրավաչափ։
