ԵՐԵՎԱՆ, 6 հուլիսի — Sputnik. Հայաստանի և Ադրբեջանի արտգործնախարարների` Էդվարդ Նալբանդյանի և Էլմար Մամեդյարովի հանդիպումը որևէ լուրջ արդյունք չի ունենա, Sputnik Արմենիայի հետ զրույցում ասաց քաղտեխնոլոգ Վիգեն Հակոբյանը։
Նալբանդյան-Մամեդյարով հանդիպումը, ոչ պաշտոնական տվյալների համաձայն, տեղի կունենա հուլիսի 11-ին Ավստրիայում։
«Կարծում եմ` որևէ լուրջ արդյունք չի կարող լինել, քանի որ բավականին ոչ բարենպաստ ֆոն է ստեղծվել հանդիպման համար։ Փոխադարձ անվստահության մակարդակը սահմանակետին է հասել, հատկապես վերջին օրերին և ամիսներին։ Անընդհատ բախումներ են լինում, զոհեր», — ասաց Հակոբյանը։
Փորձագետը կարծում է, որ Հայաստանի և Ադրբեջանի արտգործնախարարների հանդիպումն ավելի շատ պարտադրված է միջազգային հանրության կամ համանախագահ երկրների կողմից։ Ըստ նրա`ստեղծված իրավիճակից ելնելով` կարելի է ասել, որ բանակցությունները հերթական ձևական քայլը կլինեն։
Քիչ հավանական է, որ նախարարները կարողանան հող նախապատրաստել Սարգսյան-Ալիև հանդիպման համար։
«Բանն այն է, որ նրանք խոսելու բան չունեն, նախորդ պայմանավորվածությունները չեն իրագործվում։ Նախագահների հանդիպման համար հարկավոր է ձևավորել օրակարգ, որը չկա»,–ասաց Հակոբյանը` հավելելով, որ հանդիպումը հետախուզական բնույթ կկրի։
Չի բացառվում, որ բանակցությունների արդյունքի վրա որոշակիորեն ազդեցություն ունենա Պուտին-Թրամփ հանդիպումը։ Որպես կանոն` այս մակարդակով լուրջ աշխարհաքաղաքական հարցեր են քննարկվում։
«Սա դեռ նույնիսկ կանխատեսումներ չեն, այլ` գուշակություններ։ Տեսնենք` ինչ կլինի G20 հանդիպմանը», — ասաց Հակոբյանը։
Ռուսաստանի և ԱՄՆ նախագահներ Վլադիմիր Պուտինն ու Դոնալդ Թրամփը կհանդիպեն հուլիսի 7-ին Համբուրգում կայանալիք G20 գագաթնաժողովի շրջանակում։
