ԵՐԵՎԱՆ, 16 նոյեմբերի — Sputnik. Հայաստանի և Ադրբեջանի ԱԳ նախարարներ Էդվարդ Նալբանդյանի ու Էլմար Մամեդյարովի հերթական հանդիպումը տեղի կունենա այս տարվա դեկտեմբերին, Վիեննայում: Այս մասին գրված է համանախագահների հայտարարության մեջ, հաղորդում է ՌԻԱ Նովոստին:
Նշված է, որ ԵԱՀԿ ՄԽ համանախագահները՝ Իգոր Պոպովը՝ ՌԴ-ից, Ստեֆան Վիսկոնտին՝ Ֆրանսիայից և Էնդրյու Շոֆերն՝ ԱՄՆ-ից, նոյեմբերի 14-16 հանդիպել են Էդվարդ Նալբանդյանի և Էլմար Մամեդյարովի հետ և քննարկել հակամարտության կարգավորմանն ուղղված կոնկրետ քայլեր, որոնք ձեռք էին բերվել Հայաստանի և Ադրբեջանի նախագահներ Սերժ Սարգսյանի և Իլհամ Ալիևի 2017թ.-ի հոկտեմբերի 16-ին Ժնևում կայացած հանդիպման ժամանակ:
«Նախարարները պայմանավորվել են կուլիսներում համատեղ քննարկում ունենալ Վիեննայում կայանալիք ԵԱՀԿ նախարարների նիստի ժամանակ: Համանախագահներն առաջարկում են քննարկել խնդրի լուծման քաղաքական տարբերակն ու շփման գծում լարվածության թուլացման քայլերը»,-ասված է հայտարության մեջ:
