ԵՐԵՎԱՆ, 12 դեկտեմբերի — Sputnik. Փարիզը պատրաստ է վճռականորեն միանալ արցախյան հիմնախնդրի վերաբերյալ բանակցությունների միջնորդական աշխատանքին, ասաց ՀՀ–ում Ֆրանսիայի արտակարգ և լիազոր դեսպան Ժոնաթան Լաքոտը։
Նրա խոսքով` երբ 2017 թվականի ընթացքում սահմանին զոհվել է 57 զինվոր, ավելորդ է խոսել «սառեցված» հակամարտության մասին։
«Այդ հակամարտությունը մտահոգում է մեզ։ Ֆրանսիան վճռականորեն ներգրավվել է աշխատանքներին, որոնք պետք է լուծեն հարցը ուժի չկիրառման սկզբունքով։ Այս հակամարտությունը ռազմական լուծում ունենալ չի կարող», – ասաց Լաքոտը։
Դեսպանի խոսքով` պետք է հաշվի առնվեն նաև երկու այլ սկզբունքներ` ժողովրդի ինքնորոշման իրավունքն ու տարածքային ամբողջականությունը։ Հենց այդ երեք սկզբունքներն են դրված բանակցային գործընթացի կենտրոնում։
Լաքոտը նշեց, որ Ֆրանսիան պատրաստ է ամբողջությամբ իրականացնել ԵԱՀԿ ՄԽ շրջանակներում ստանձնած պարտավորությունները և դրական է գնահատել Հայաստանի և Ադրբեջանի ԱԳՆ ղեկավարների և նախագահների հանդիպումները։
Դրա հետ մեկտեղ Լաքոտն ընդգծեց, որ վերջնական լուծումը գտնվում է հակամարտող կողմերի ձեռքին է։