12:26 20 ապրիլի 2018
Ուղիղ եթեր
Սերժ Սարգսյանն ու Կարեն Կարապետյանը

Քաղաքականություն հայկական ձևով. Սարգսյանը հեռացավ, կեցցե՛ Սարգսյանը

© Предвыборный сайт РПА
Քաղաքականություն
Ստանալ կարճ հղումը
17920

Սերժ Սարգսյանն առաջվա պես երկրի առաջին դեմքն է, Կարեն Կարապետյանը` երկրորդ։ Նախագահի ինստիտուտն էլ զուտ խորհրդանշական է։

ԵՐԵՎԱՆ, 10 ապրիլի — Sputnik, Աշոտ Սաֆարյան. Ապրիլի 9-ի գործընթացներն ու իրադարձությունները վերջակետ դրեցին Հայաստանում մոտակա մի քանի տարիների ներքաղաքական փոփոխություններին։

ՀՀ նորընտիր նախագահ Արմեն Սարգսյանը երեկ երդվեց և ստանձնեց պաշտոնը։ Նախորդ նախագահ Սերժ Սարգսյանը հանձնեց լիազորությունները, բայց գրեթե միաժամանակ հայտնի դարձավ, որ քաղաքականության Օլիմպոսը լքել չի պատրաստվում։ Սարգսյանը կշարունակի ղեկավարել երկիրը վարչապետի կարգավիճակում, որի ձեռքերում այսուհետ կենտրոնացած կլինեն իշխանության բոլոր լծակները, ինչը նախատեսված է նոր սահմանադրությամբ։

Սարգսյանի` վարչապետի պաշտոնը ստանձնելու մասին հայտարարեց կառավարության ղեկավարի պարտականությունները կատարող Կարեն Կարապետյանը։

«Համակարծիք էինք, որ երկրի առջև կանգնած մարտահրավերների և խնդիրների պարագայում կառավարման նոր համակարգին սահուն անցումը ապահովելը և վերջնական ձևավորումը չափազանց կարևոր խնդիր է: Ինչպես նաև հաշվի առնելով վերջին ժամանակահատվածում ներկայիս կառավարման կոնֆիգուրացիայով արձանագրված հաջողությունները՝ որոշել ենք մեր կուսակցական գործընկերներին առաջարկել այս ժամանակահատվածում ներկայիս կառավարման կոնֆիգուրացիան պահպանել, այսինքն, որպես առաջին դեմք ներկայացնել Սերժ Սարգսյանի թեկնածությունը», — ասել է նա։

Քաղտեխնոլոգ Կարեն Քոչարյանի կարծիքով` երեկվա դեպքերը ֆիքսել են ներկայիս քաղաքական ստատուս քվոյի անսասանությունը` Սերժ Սարգսյանը շարունակում է մնալ առաջին դեմքը, ինչպես առաջ, Կարապետյանը` երկրորդ։ Իսկ նախագահի ինստիտուտը զուտ խորհրդանշական նշանակություն է ստանում։

«Եկեք անկեղծ լինենք, Արմեն Սարգսյանը փաստացի որևէ իրավասություն չի ունենալու, քանի որ հիմնական հարցերը վարչապետն է լուծելու։ Չեմ բացառում, որ Սարգսյանը կկարողանա օգտագործել իր արտաքին կապերը երկրում որոշակի ներդրումներ ներգրավելու համար, բայց առանձնակի պատրանքներ չունեմ», — երեքշաբթի հրավիրված ասուլիսի ժամանակ ասաց Քոչարյանը։

Ամփոփելով նախագահի պաշտոնում Սերժ Սարգսյանի 10 տարվա գործունեության արդյունքները` Քոչարյանը նշեց, որ և՛ ձախողումներ են եղել, և՛ որոշակի ձեռքբերումներ։ Քոչարյանը Սարգսյանի քաղաքականության ձախողում է համարում քաղաքական դաշտի գրեթե ամբողջական քայքայումը` ընդդիմության ոչնչացումը և, որպես հետևանք, քաղաքական ուժերի գաղափարական պայքարի բացակայությունը։ Նրա խոսքով` նույնիսկ «Դաշնակցություն» կուսակցությունը, որը երկար ժամանակ կոնկրետ անձնավորության վրա չհիմնված գաղափարական ուժ էր համարվում, կորցրեց իր նախկին դեմքն ու դիրքը։

Քոչարյանը երրորդ նախագահի ձեռքբերումներից մեկն է համարում «հայաստանցի հայեր» և «ղարաբաղցի հայեր» հասկացության վերացումը։ Երկար տարիներ Հայաստանի և Լեռնային Ղարաբաղի բնակիչների միջև որոշակի «անտագոնիզմ» կա, ինչը հասարակության մեջ պառակտում և դեզինտեգրացիա էր առաջացնում։ Այժմ, փորձագետի խոսքով, այդ տարբերակումը գրեթե չկա։

Քոչարյանը կարծում է, որ առաջիկա տարիներին իշխանության ներսում տեղի ունեցող կադրային, համակարգային բարեփոխումները չափազանց պահանջված են լինելու. նոր դեմքեր են անհրաժեշտ և կառավարման նոր որակ։ Հակառակ դեպքում ՀՀԿ-ն ԽՄԿԿ-ի օրինակով աստիճանաբար կփտի ներսից։

Սարգսյանն իր նախագահության տարիների ընթացքում ամբողջությամբ չհասցրեց վերացնել տնտեսական մենաշնորհներն ու կոռուպցիան, կարծում է քաղտեխնոլոգը։ Կարելի է պնդել, որ կոռուպցիան մասամբ վերացել է, մասամբ մեկ այլ ձևաչափի անցել։

Նշենք, որ ներքաղաքական տեղափոխությունները կավարտվեն ապրիլի 17-ին, երբ երկրի խորհրդարանը կընտրի նոր վարչապետին։ Իշխող կուսակցությունը կառավարության ղեկավարի անունը պաշտոնապես կհայտարարի կուսակցության Գործադիր մարմնի` ապրիլի 11-ին կայանալիք նիստից հետո։ Մինչ այդ այժմ արդեն նախկին նախագահ և, ամենայն հավանականությամբ, ապագա վարչապետ Սերժ Սարգսյանը մեկշաբաթյա արձակուրդի ընթացքում հանգստանալու և ուժերը հավաքելու հնարավորություն ունի։

Գլխավոր թեմաներ