ԵՐԵՎԱՆ, 1 մայիսի — Sputnik. ՀՀԿ-ն փորձում է տապալել ժողովրդի թեկնածուի ընտրությունը Այդ մասին Facebook-ի իր էջում հայտնել է վարչապետի թեկնածու, «Իմ քայլը» շարժման առաջնորդ Նիկոլ Փաշինյանը։
«Մենք քիչ առաջ տեղեկություն ստացանք, որ գիշերային մի ժողովի ընթացքում հանրապետականները` Սերժ Սարգսյանի գլխավորությամբ, որոշել են տապալել վարչապետի ընտրությունը։ Այսինքն այնպես անել, որ չընտրվի ժողովրդի թեկնածուն»,- ասել է նա։
Փաշինյանը կոչ է արել մարդկանց հարյուր հազարներով գալ Հանրապետության հրապարակ։
«Պետք է ի ցույց դնեք ձեր կամքը, ձեր աջակցությունը, որ կարողանանք ձախողել Սերժ Սարգսյանի ծրագրած նոր պլանը։ ՀՀԿ-ն ուզում է ձախողել վարչապետի ընտրությունները եւ հաջորդ փուլում փորձեն վերականգնել հանրապետականի իշխանությունը։ Համոզված եմ, որ ժողովրդի կամարտահայտման միջոցով կկարողանանք սրա դեմն առնել»,- նշել է Փաշինյանը։
Փաշինյանը հիշեցրել է, որ հավաքվում են առավոտյան Հանրապետության հրապարակում։
Հիշեցնենք. որ երեկ` ապրիլի 30-ին, «Ելք» խմբակցությունն իր նիստում որոշեց ՀՀ վարչապետի պաշտոնում առաջադրել Նիկոլ Փաշինյանի թեկնածությունը: Փաշինյանն իր թիմակիցների հետ դռնփակ բանակցություններ անցկացրեց ՀՅԴ–ի և «Ծառուկյան» դաշինքի պատգամավորների հետ։ Նրանք հայտարարեցին, որ ԱԺ–ում կայանալիք քվերակության ժամանակ սատարելու են Փաշինյանին։ Իսկ ՀՀԿ խմբակցության պատգամավորների հետ հանդիպումից հետո ԱԺ փոխխոսնակ, ՀՀԿ մամուլի քարտուղար Էդուարդ Շարմազանովը հայտարարեց, որ իրենք իրենց որոշման մասին կհայտնեն քվեարկությունից առաջ։
ՀՀ նախագահի պաշտոնը 2008 թվականից զբաղեցնող Սերժ Սարգսյանն ապրիլի 23-ին հրաժարվեց վարչապետի պաշտոնից։ Նոր վարչապետի ընտրության հարցը կքննարկվի այսօր` մայիսի 1-ին, Ազգային ժողովի հատուկ նիստում։ ՀՀ վարչապետի միակ թեկնածուն Նիկոլ Փաշինյանն է։
Ընտրվելու համար Փաշինյանը պետք է առնվազն 53 ձայն ստանա։ «Ելքը», ՀՅԴ-ն ու «Ծառուկյան» դաշինքը միասին ունեն 47 պատգամավոր։ Առանց ՀՀԿ-ի լրացուցիչ ձայների Փաշինյանն ընտրվել չի կարող։
