ԵՐԵՎԱՆ, 25 հունիսի — Sputnik. ՀՀ վարչապետ Նիկոլ Փաշինյանը կարող է համագործակցել ՀՀԿ-ի հետ` արտահերթ ընտրություններում «Ծառուկյան» դաշինքից ձայներ տանելու համար, այսօր լրագրողներին ասաց քաղտեխնոլոգ Վիգեն Հակոբյանը։
Նրա խոսքով` կառավարություն ծրագրի հրապարակումից հետո, որտեղ նշված էր արտահերթ ընտրությունների անցկացման առավելագույն ժամկետը, սկսվել է նախընտրական պայքարի ոչ ֆորմալ մեկնարկի մասին։
«Այն ամենը, ինչ կատարվել և կատարվում է այս ընթացքում, պետք է նայենք ընտրությունների նախապատրաստության պրիզմայով», — ասաց Հակոբյանը։
Նրա խոսքով` արտահերթ ընտրությունների անցկացման ժամկետը կախված է Ընտրական օրենսգրքի փոփոխությունների տևողությունից, որն էլ պայմանավորված է մասնակից քաղաքական ուժերի ցանկությամբ։
«Եթե ընտրությունները հիմա անցկացվեին կամ երկու ամիս հետո անցկացվեն, պարզ է, որ դա միանշանակ ձեռնտու է այսօրվա իշխանություններին: Ժամանակը աշխատում է այսօրվա իշխանությունների դեմ, բայց Փաշինյանը հայտարարել է, որ ժամանակ պետք է տրվի մյուս ուժերին՝ ընտրություններին պատրաստվելու համար», — ասաց Հակոբյանը։
Նրա խոսքով` սա հստակ ուղերձ է։ ՀՀԿ-ի համար ավելի ձեռնտու կլիներ, որ ընտրությունները հնարավորինս հետաձգվեին, ամեն ինչ կախված է նրանից, թե արդյոք Փաշինյանի կառավարությունը հանրապետականների հետ կապված ծրագիր ունի, թե ոչ։
«Ծառուկյան» դաշինքն այսօր բավական մրցունակ է, ԱԺ ընտրություններում նա համարվում է Փաշինյանի հիմնական մրցակիցը։ Նախևառաջ դա վերաբերում է Հայաստանի մարզերին։
Այդ պատճառով հնարավոր է, որ Փաշինյանի թիմը փորձի օգտագործել ՀՀԿ-ի ռեսուրսը «Ծառուկյան» դաշինքի ձայների մի մասը «վերցնելու» համար։ Ընդ որում, Փաշինյանի թիմն այդ հարցում կարող է համագործակցել ոչ միայն ՀՀԿ-ի, այլև այլ ուժերի հետ։
Խոսքը ոչ միայն Հայ ազգային կոնգրեսի մասին է, այլև «Օրինաց երկրի», որոնք կառույցներ և ֆինանսներ ունեն ձայներ ներգրավելու համար և կարող են օգտակար լինել Փաշինյանի համար։
Ինչ վերաբերում է ընտրությունների անցկացման օպտիմալ պահին, ապա, նրա կարծիքով, Փաշինյանի համար լավագույն տարբերակը աշունն է։
«Ընտրությունների համար նպատակահարմար ժամկետը, կարծում եմ, հոկտեմբերի վերջ, նոյեմբերի սկիզբ է, Ֆրանկոֆոնիայի գագաթաժողովից հետո, երբ Փաշինյանի վարկանիշը շատ բարձր կլինի, և այդ իրադարձությունը կարող է լուրջ գովազդ լինել վարչապետի համար, հատկապես` միջազգային դաշտում», — ասաց Հակոբյանը։
Մեդիափորձագետ Տիգրան Քոչարյանն իր հերթին նշեց, որ շատ բան կախված կլինի նրանից, թե Փաշինյանը մտադիր է նոր խորհրդարանում ստանալ 51%-ը և ստանձնել ամբողջ պատասխանատվությունը։
ՀՀԿ-ն, նրա կարծիքով, ընտրություններին կարող է ներկայանալ այլ լույսի ներքո` ազատվելով անցանկալի առաջնորդներից և ներկայանալ ավելի երիտասարդ կազմով։ Առավել ևս, որ Հայաստանի քաղաքական դաշտում չկան ուժեղ կուսակցություններ, որոնք կարևորում են քրիստոնեական, պահպանողական արժեքները։
Որոշակի դեր կարող են խաղալ նաև այլ ուժերը։ Մասնավորապես, Քոչարյանի խոսքով, քաղաքական դաշտ կարող է դուրս գալ Սամվել Բաբայանը։
Պետք չէ մոռանալ նաև Ժիրայր Սեֆիլյանի ու «Սասնա ծռերի» մասին, թեև դեռ հասկանալի չէ` նրանք ում հետ քաղաքականություն կմտնեն։
Ինչ վերաբերում է ընտրությունների անցկացման ժամկետներին, ապա Քոչարյանը նույնպես համարում է, որ լավագույն ժամանակաշրջանը նոյեմբերն է։
