ԵՐԵՎԱՆ, 20 օգոստոսի — Sputnik. «Ժառանգություն» կուսակցությունը մտադիր է օգոստոսի 20-ի երեկոյան քննարկել սեպտեմբերի 23-ին կայանալիք Երևանի ավագանու արտահերթ ընտրություններին մասնակցելու ձևաչափը։ Այս մասին երկուշաբթի հրավիրված մամուլի ասուլիսին հայտնեց կուսակցության նախագահ Րաֆֆի Հովհաննիսյանը
Հովհաննիսյանը հիշեցրեց, որ ավելի վաղ «Ժառանգությունը», ՀՀ վարչապետ Նիկոլ Փաշինյանի «Քաղաքացիական պայմանագիր» կուսակցության և այլ քաղաքական ուժերին դիմելով, հանդես է եկել միասնական ցուցակով ընտրություններին մասնակցելու կոչով, սակայն դեռ պատասխան չի ստացել։
«Այժմ մենք երեք թեկնածություն ենք քննարկում` իմ, կուսակցության փոխնախագահ Արմեն Մարտիրոսյանի և ևս մեկ քաղաքական գործչի, որի անունն այս պահին նշել չեմ կարող», — ասաց Հովհաննիսյանը։
Նա համոզված է, որ 20 տարվա ընթացքում առաջին անգամ Հայաստանում օրինական ընտրություններ են անցկացվելու։ Միևնույն ժամանակ Հովհաննիսյանը հույս հայտնեց, որ նոր իրողություններում կբացառվի ընտրակաշառք բաժանելու, վարչարարական ռեսուրսի օգտագործման և այլ խախտումների հնարավորությունը։
Քաղաքական գործիչը խոստովանեց, որ «Ժառանգություն» կուսակցությունը հիմա ինքնության բարդույթ ունի։ Ընդդիմադիր գործունեությունից հետո կուսակցությունը իշխանության չեկավ, բայց արդեն իրեն ընդդիմություն էլ չի համարում, թեև ժամանակ առ ժամանակ քննադատում է «Քաղաքացիական պայմանագրի» և վարչապետ Նիկոլ Փաշինյանի գործունեությունը։
Ավագանու ընտրություններին կմասնակցեն դերասան և պրոդյուսեր Հայկ Մարությանը («Քաղաքացիական պայմանագիր» կուսակցություն), Զարուհի Փոստանջյանը («Երկիր ծիրանի»), Արարատ Զուրաբյանը («ՀՀՇ»), հայտնի ճարտարապետ Արթուր Թարխանյանի դուստրը` Անահիտ Թարխանյանը, Նաիրա Զոհրաբյանը («ԲՀԿ»)։ «Լուսավոր Հայաստան» կուսակցությունն ու ՀՀԿ-ն իրենց հերթին առաջարկում են ՀՀ արդարադատության նախարար Արտակ Զեյնալյանի թեկնածությունը։ «Ժողովրդավարական ուղի» կուսակցությունն առաջադրում է Մանուել Գասպարյանի թեկնածությունը։
