ԵՐԵՎԱՆ, 11 սեպտեմբերի — Sputnik. Հայաստանի արտգործնախարար Զոհրաբ Մնացականյանը երեքշաբթի հայտարարեց լրագրողներին, որ շատ շուտով կկայանա ադրբեջանցի գործընկեր Էլմար Մամեդյարովի հետ հանդիպումը։
«Հանդիպումը (Հայաստանի և Ադրբեջանի ԱԳՆ ղեկավարների` խմբ.) կկայանա, և դա կլինի շատ շուտով», — ասաց Մնացականյանը Ֆրանկոֆոնիայի միջազգային կազմակերպության գլխավոր քարտուղար Միքայել Ժանի հետ համատեղ մամուլի ասուլիսում։
Միաժամանակ նա կոչ արեց լրագրողներին մի քիչ համբերել, քանի որ հանդիպման մասին հայտարարությունը պետք է համաձայնեցված լինի` ընդունված կանոնները պահպանելու համար։
«Ես փորձում եմ այդ հարցում լինել շատ կոռեկտ և հայտարարություններ անել համաձայնեցված կերպով: Հանդիպման մասին մենք կհայտարարենք համաձայնեցված կերպով, որպեսզի պահպանենք միմյանց նկատմամբ հարգանքը»,- ասաց ՀՀ ԱԳՆ ղեկավարը:
Նա հիշեցրեց, որ հայկական կողմը ներգրավված է բանակցային գործընթացում: «Մենք արտահայտել ենք մեր հավատարմությունը խաղաղ բանակցությունների գործընթացին: Հուլիսին հանդիպում եղավ Բրյուսելում, գործընթացը շարունակելու պայմանավորվածություն ձեռք բերվեց, կազմակերպելու հաջորդ հանդիպումը: Այդ հանդիպումը տեղի է ունենալու շատ շուտով: Համաձայնեցված ձևով կխոսենք այդ մասին»,- նշեց Մնացականյանը:
Ավելի վաղ Ադրբեջանի ԱԳՆ ղեկավար Էլմար Մամեդյարովը հայտարարել է, որ սեպտեմբերին ՄԱԿ Գլխավոր վեհաժողովի շրջանակում նախատեսված է նրա` Ղարաբաղի հարցով հանդիպումը հայ գործընկերը Զոհրաբ Մնացականյանի հետ։
Մամեդյարովի և Մնացականյանի առաջին հանդիպումը տեղի է ունեցել հուլիսի 11-ին Բրյուսելում ԵԱՀԿ Մինսկի խմբի համանախագահների միջնորդությամբ։
