ԵՐԵՎԱՆ, 23 սեպտեմբերի — Sputnik. Այսօր առավոտյան, ժամը 08։00-ին բացվել են Երևանի բոլոր 475 ընտրական տեղամասերը։ Երևանի ավագանու ընտրությունների մեկնարկը տրվել է նախանշված ժամին։
Երևանի ավագանու 2018 թվականի սեպտեմբերի 23-ի արտահերթ ընտրություններին մասնակցելու իրավունք ունեցող ընտրողների թիվը, ոստիկանության հրապարակած ցուցակների համաձայն, 844 343 է։
Նշենք, որ Երևանի մասին օրենքով` ավագանու ընտրություններին մասնակցության իրավունք ունեն նաև ՀՀ քաղաքացի չհանդիսացող, բայց Երևանի առնվազն 1 տարվա գրանցում ունեցող մայրաքաղաքի բնակիչները։
Երևանի ավագանու ընտրություններին կհետևեն ավելի քան 600 դիտորդ տեղական 8 կազմակերպություններից։
Հիշեցնենք` Երևանի քաղաքապետ Տարոն Մարգարյանը հուլիսի 9-ին հրաժարական էր ներկայացրել։
Քաղաքապետի պաշտոնը թափուր մնալուց և նոր քաղաքապետի չընտրելուց հետո ավագանին օրենքի ուժով լուծարվեց։ ՀՀ կառավարության որոշմամբ ավագանու արտահերթ ընտրության օր նշանակվեց 2018թ–ի սեպտեմբերի 23-ը։
Երևանի ավագանու ընտրություններին այսօր մասնակցում է 12 քաղաքական կուսակցություն և դաշինք։
