ԵՐԵՎԱՆ, 3 հոկտեմբերի — Sputnik. ՀՀ վարչապետ Նիկոլ Փաշինյանն ուղիղ չպատասխանեց այն հարցին, թե պատրաստ է արդյոք համագործակցել կոալիցիոն նախկին գործընկերների հետ։
Երեկ ՀՅԴ-ն ու «Ծառուկյանը» լքեցին կառավարությունը։ Փաշինյանը նրանց մեղադրեց հակահեղափոխությանը աջակցելու ու արտահերթ ընտրությունները սաբոտաժի ենթարկելու մեջ։
Կարո՞ղ է արդոք Փաշինյանը երբևէ հետագայում համագործակցել նրանց ու ՀՀԿ-ի հետ։ Այդ հարցին Փաշինյանը պատասխանեց. «Դաշնակցությունը բազմաշերտ կուսակցություն է, ու մի շերտի պահվածքով չի կարելի դատել մնացած շերտերի մասին»։ Ճշտող հարցին, թե ինչ է մտածում «Ծառուկյանի» ու ՀՀԿ-ի մասին, Փաշինյանը չպատասխանեց։
Հիշեցնենք` երեկ՝ հոկտեմբերի 2-ին, ԱԺ-ի դիմաց կազմակերպված բողոքի ակցիայի ժամանակ ՀՀ վարչապետ Նիկոլ Փաշինյանը հայտարարել էր, որ նախագահին առաջարկել է աշխատանքից ազատել ԲՀԿ-ական և ՀՅԴ-ական նախարարներին ու մարզպետներին։ Մինչ այդ ՀՅԴ-ն արդեն հետ էր կանչել իր 2 նախարարներին:
Հայաստանի նախագահ Արմեն Սարգսյանն այս գիշեր հրամանագրեր է ստորագրել, որոնց համաձայն` աշխատանքից ազատվել են ԲՀԿ-ական և ՀՅԴ-ական վեց նախարարները:
Մասնավորապես, աշխատանքից ազատվել են Տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը (ԲՀԿ), Սպորտի և երիտասարդության հարցերի նախարար Լևոն Վահրադյանը (ԲՀԿ), Արտակարգ իրավիճակների նախարար Հրաչյա Ռոստոմյանը (ԲՀԿ), Էներգետիկ ենթակառուցվածքների և բնական պաշարների նախարար Արթուր Գրիգորյանը (ԲՀԿ), գյուղատնտեսության նախարար Արթուր Խաչատրյանը (ՀՅԴ) և տնտեսական զարգացման և ներդրումների նախարար Արծվիկ Մինասյանը (ՀՅԴ):
