ԵՐԵՎԱՆ, 4 հոկտեմբերի – Sputnik. ՀՀԿ փոխնախագահ, պատգամավոր Արմեն Աշոտյանը տեղեկացել է, որ վարչապետ Նիկոլ Փաշինյանն առավոտյան անդրադարձել է այն խնդիրներին, որը պատգամավորը բարձրացրել է երեկ ԱԺ-ում հարցուպատասխանի ընթացքում:
«Ընդհանուր առմամբ դրական եմ գնահատում նման հետևողականությունը, հավելեմ միայն, որ հատկապես վարչապետը պետք է առավել ճշգրիտ լինի իր գրառումներում և ինձ չվերագրի բաներ, որ ես չեմ ասել, մասնավորապես՝ ապակիների ջարդելու հետ կապված»,- Facebook սոցիալական ցանցում գրել է Աշոտյանը:
Նա նաև հիշեցում և պարզաբանումներ է ներկայացրել: Առաջինը վերաբերում է ԱԺ պատգամավոր Ռուզաննա Առաքելյանին։
«Մինչ մեր հարցուպատասխանը մամուլն արդեն անդրադարձել էր, որ պատգամավորի մասնակցությամբ միջադեպ է եղել, որի արդյունքում պատգամավորի աշխատանքը խոչընդոտվել է: Ես իմ հարցում օգտագործել եմ «երեկ տեղիունեցածով» բնորոշումը, և ոչ թե պետական քարոզչամեքենայի կողմից հրամցվող բռնություն բառը: Հիմա որոշ զլմ-ներ և ոստիկանությունը հերքում են բռնությունը, բայց փաստացի հաստատում միջադեպը: Ուստի փաստեմ, որ ես իրավացի էի»,- գրել է Աշոտյանը:
Նա խնդրել է վարչապետին հրահանգել ոստիկանությանը պարզելու, թե այդ միջադեպի հետևանքով ովքեր են խոչընդոտել Ռուզաննա Առաքելյանի, ինչպես նաև այլ պատգամավորների պարտականությունների կատարմանը: Աշոտյանը մի փոքր հուշում էլ է արել՝ նայել ՀՀ Քրեական օրենսգրքի 301.1 հոդվածը:
«Երեկ ԱԺ-ում նույն հարցուպատասխանի ժամանակ ասել եմ, որ «մեքենաներ են վնասվել»: Եվ խոսքը չէր գնում ԱԺ աշխատակազմի մեքենաների մասին, ինչպես որոշ զլմ-ներ ուղղորդված փորձեցին ներկայացնել: Նույն թեմային երեկ, մինչև վարչապետի այսօրվա գրառումը, անդրադարձել է նաև մամուլը։ Այլ պատգամավորների մեքենաների անիվների վնասում, մեքենաների վրա վիրավորական գրառումներ և խազեր նույնպես եղել են»,- գրել է նա:
Աշոտյանը նաև հորդորներ է ներկայացրել։
«Վարչապետի մամլո ծառայությանը՝ ժամանակին և ամբողջությամբ տեղեկացնել Նիկոլ Փաշինյանին նման հրապարակումների մասին: ՀՀ Ոստիկանությանը՝ ժամանակին և օպերատիվ արձագանքել մամուլի նմանատիպ հրապարակումներին և չսպասել վարչապետի հետ պատգամավորների հարցուպատասխանին: Պատկան մարմիններին՝ ուսումնասիրել նշված հրապարակումները, այդ թվում՝ պատգամավորների աշխատանքը խոչընդոտելու ահազանգերը, և պատշաճ ընթացք տալ»,- գրել է նա:
Աշոտյանը նշել է, որ պատրաստ է իր հնարավորության շրջանակում ապագայում նույնպես վարչապետին իրազեկել և աջակցել ընտրողական մոտեցումներից խուսափելու և օրինականության պահպանման հարցերում:
