ԵՐԵՎԱՆ, 17 հոկտեմբերի — Sputnik. ՀՀ երկրորդ նախագահ Ռոբերտ Քոչարյանի ներկայացուցիչ Հովհաննես Խուդոյանը միջնորդություն է ներկայացրել Քննչական կոմիտե` Քոչարյանին տուժողի կարգավիճակ տալու վերաբերյալ: Այս մասին Sputnik Արմենիային հայտնեց Հովհաննես Խուդոյանը։
Խոսքը Քննչական կոմիտեի վարույթում քննվող ԱԱԾ տնօրենի և ՀՔԾ պետի հեռախոսազրույցի գաղտնալսման փաստով հարուցված քրեական գործի մասին է։
«Միջնորդությունը Քննչական կոմիտե ներկայացվել է հաշվի առնելով այն հանգամանքը, որ հրապարակված ձայնագրության բովանդակությունը պարունակում է այնպիսի տվյալներ, որոնք առերևույթ հաստատում են Ռոբերտ Քոչարյանի ազատությունն ապօրինի սահմանափակելուն ուղղված գործողությունների կատարման փաստը»,– ասաց փաստաբանը։
Հովհաննես Խուդոյանը գտնում է, որ տուժողի դատավարական կարգավիճակի ճանաչումն իրավաչափ կլինի, իսկ մերժումը կասկածի տակ կդնի նախաքննության օբյեկտիվությունը:
Հիշեցնենք` սեպտեմբերի 11-ին համացանցում հայտնվել էր ՀՀ Ազգային անվտանգության ծառայության տնօրեն Արթուր Վանեցյանի և Հատուկ քննչական ծառայության պետ Սասուն Խաչատրյանի հեռախոսազրույցի ձայնագրությունը։ Արթուր Վանեցյանն ու Սասուն Խաչատրյանը 8-րոպեանոց հեռախոսազրույցի ընթացքում ի թիվս այլ հարցերի քննարկում են նաև Հայաստանի նախկին նախագահ Ռոբերտ Քոչարյանի նկատմամբ կալանքը որպես խափանման միջոց ընտրելու հարցը` նշելով, որ այդ հարցով իրենց զանգահարել է նաև որոշումը կայացնող դատավորը։