ԵՐԵՎԱՆ, 22 հոկտեմբերի — Sputnik. ՀՅԴ խմբակցությունը կողմ է քվեարկելու Ընտրական օրենսգրքի փոփոխությունների փաթեթին: Այս մասին այսօր ԱԺ-ում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանը:
«Մենք միշտ կողմ ենք քվեարկել այն նախագծերին, որոնք առաջընթաց են ապահովում: Արարատ Միրզոյանի հետ քննարկմանն արդեն ասել ենք, որ, քանի որ փոփոխությունների ուղղությունը ճիշտ է, մենք չենք կարող սրան դեմ լինել»,- ասաց Ռուստամյանը` միաժամանակ շեշտելով, որ ընտրական օրենսգրքի ներկայացված նախագծում դրական տեղաշարժեր կան:
Այդուհանդերձ, ՀՅԴ-ն, Ռուստամյանի խոսքով, հապշտապ ընտրությունների գնալը սխալ է համարում, չի ընդունում նաև Ընտրական օրենսգիրքը 24 ժամվա ընթացքում ընդունելը, քանի որ նախագծում ՀՅԴ խմբակցության ներկայացրած երեք առաջարկները չեն ընդունել ժամանակի սղության պատճառաբանությամբ:
Հիշեցնենք`ՀՀԿ խմբակցությունը հայտարարել է, որ դեմ է քվեարկելու Ընտրական օրենսգրքի և հարակից օրինագծերի փոփոխությունների փաթեթին: «Ելք» և «Ծառուկյան» դաշինքները հայտարարել են, որ կողմ են քվեարկելու:
