ԵՐԵՎԱՆ, 23 հոկտեմբերի — Sputnik. «Ելք» խմբակցության ղեկավար Լենա Նազարյանն այսօր` հոկտեմբերի 23-ին, ԱԺ ամբիոնից հայտարարեց, որ վարչապետի պաշտոնում առաջադրել է Նիկոլ Փաշինյանի թեկնածությունը, բայց միաժամանակ կոչ արեց նրա օգտին վաղվա նիստում չքվեարկել։
Նա հայտնեց, որ որոշումը պայմանավորված է իրավաբանների դիրքորոշմամբ, որոնք առաջադրումն անհրաժեշտ պայման են համարել:
Հիշեցնենք` վաղը` հոկտեմբերի 24-ին, Ազգային ժողովը հատուկ նիստ կգումարի ՀՀ վարչապետի ընտրության հարցով: Թեկնածուների առաջադրման ժամկետն ավարտվում է այսօր 18։00-ին։ Այս պահին Փաշինյանը միակ առաջադրված թեկնածուն է: Մինչ այդ ՀՀԿ-ն հայտարարել էր, որ թեկնածու չի առաջադրելու։
ԱԺ արտահերթ ընտրությունները վարչապետի պաշտոնակատար Նիկոլ Փաշինյանի նախաձեռնությամբ կկայանան դեկտեմբերի կեսին, եթե խորհրդարանը 2 անգամ անընդմեջ 2 շաբաթվա ընթացքում վարչապետ չընտրի: Այդ նպատակով Նիկոլ Փաշինյանը հոկտեմբերի 16-ին հրաժարական էր ներկայացրել: Վարչապետի ընտրության հարցով հատուկ նիստը կգումարվի վաղը` հոկտեմբերի 24-ին: Նիստի ժամը դեռ պաշտոնապես չի հայտարարվում: Վաղվա հատուկ նիստում վարչապետ չընտրելու դեպքում Ազգային ժողովը-ը ևս մեկ նիստ կգումարի 7 օր անց, որից հետո օրենքի ուժով խորհրդարանը կցրվի և կնշանակվեն ԱԺ արտահերթ ընտրություններ:
