ԵՐԵՎԱՆ, 2 նոյեմբերի – Sputnik. ՀՀ պաշտպանության նախարարի պաշտոնակատար Դավիթ Տոնոյանն աշխատանքային այցով մեկնել է Լիբանանի Հանրապետություն։ Facebook սոցիալական ցանցում է այս մասին գրել է ՊՆ մամուլի խոսնակ Արծրուն Հովհաննիսյանը։
Օդանավակայանում Տոնոյանին դիմավորել է Լիբանանի պաշտպանության նախարար Յաքուբ Սարրաֆը։
Երկու բարեկամ երկրների պաշտպանության նախարարները, ողջունելով իրար, կարճ քննարկում են ունեցել։
Այսօր՝ նոյեմբերի 2–ին, Տոնոյանն է այցելել է Լիբանանի Հանրապետության պաշտպանության նախարարություն։
Պատվո պահակախմբի ողջույնից հետո նա ծաղկեպսակ է դրել Լիբանանի նահատակված զինվորների հուշարձանին և վառել անմար կրակը։
Այնուհետև երկու նախարարներն աշխատանքային հանդիպում են անցկացրել։ Քննարկվել են համագործակցության համատեղ ծրագրեր տարածաշրջանային և միջազգային անվտանգության հարցեր։
Հանդիպման ավարտին երկու նախարարները ստորագրել են Ռազմական համագործակցության մասին համաձայնագիր։
Լիբանանի Հանրապետության պաշտպանության նախարարությունից Տոնոյանը մեկնել է հայ խաղաղապահների տեղակայման վայր։
