ԵՐԵՎԱՆ, 7 դեկտեմբերի — Sputnik. 6-րդ գումարման Ազգային ժողովն այսօր գրանցված 9 պատգամավորով ավարտեց աշխատանքը։ Այդ մասին 14։00 հայտարարեց նիստը վարող ԱԺ փոխնախագահ Միքայել Մելքումյանը։
Չնայած կիսադատարկ դահլիճին, նա շնորհակալություն հայտնեց գործընկերներին համատեղ աշխատանքի համար ու համոզմունք հայտնեց, որ 6-րդ գումարման Ազգային ժողովը կմտնի պատմություն` որպես հեղափոխական շրջանում իր պարտականությունները պատշաճ իրականացրած օրենսդիր մարմին։
Հիշեցնենք`այս շաբաթ ԱԺ նիստերի օրակարգում պետք է քննարկվեր նաև Կաշառքի ու փողերի լվացման մեջ մեղադրվող ԱԺ ՀՀԿ խմբակցության պատգամավոր Արամ Հարությունյանին պատգամավորական անձեռնմխելիությունից զրկելու հարցը։
Սակայն 5 օր շարունակ, քվորում չլինելու պատճառով, հարցն այդպես էլ մնաց չլուծված։
ԱԺ Կանոնակարգ օրենքի 51-րդ հոդվածի 4-րդ մասի համաձայն` ԱԺ–ի ամենօրյա աշխատանքը շարունակվեց մինչև 14։00, որից հետո նիստը վարողը ստիպված հայտարարում էր, որ նիստը չի կայացել։
2 օր հետո` դեկտեմբերի 9-ին, Հայաստանում նախանշված են ԱԺ արտահերթ ընտրություններ, որի ընթացքում կընտրվի արդեն 7-րդ գումարման ԱԺ–ն։ ԱԺ կանոնակարգ օրենքի համաձայն` գործող 6-րդ գումարման ԱԺ պատգամավորներն իրենց լիազորություններն ու անձեռնմխելիությունը կպահպանեն մինչև նորընտիր պատգամավորների երդման արարողության օրը։
Հիշեցնենք` ՀՀ գլխավոր դատախազությունը դեկտեմբերի 3-ին հայտարարել էր, որ կաշառքի ու փողերի լվացման փաստով հարուցված քրեական գործով մեղադրանք է ներկայացվել ԱԺ ՀՀԿ խմբակցության պատգամավոր, նախկին բնապահպանության նախարար Արամ Հարությունյանին։ Գլխավոր դատախազը դիմել էր ԱԺ նախագահին` Արամ Հարությունյանին անձեռնմխելիությունից զրկելու հարցով ԱԺ արտահերթ նիստ հրավիրելու միջնորդությամբ:
