ԵՐԵՎԱՆ, 14 դեկտեմբերի — Sputnik. ՀՀ ԱԺ արտահերթ ընտրությունների վերաբերյալ իրավապահ մարմինները ստացել են 442 ահազանգ, որոնք ուսումնասիրվել են ՀՀ գլխավոր դատախազությունում ստեղծված աշխատանքային խմբի կողմից։
Գլխավոր դատախազությունը հայտնում է, որ 442 դեպքերից 271–ով իրականացվել կամ իրականացվում են ստուգողական գործողություններ: Դրանց արդյունքում 161-ով ենթադրյալ իրավախախտման փաստերը հերքվել են:
147-ով քրեական գործ հարուցելու համար նյութեր են նախապատրաստվում։ Դրանցից 113-ը վերաբերում է մեկից ավելի անգամ կամ այլ անձի փոխարեն քվեարկելու փորձերին, 4-ը վստահված անձի լիազորությունների իրականացմանը խոչընդոտելուն, 13-ը՝ ընտրական իրավունքի ազատ իրականացմանը խոչընդոտելուն, 1-ը՝ ընտրողի ազատ կամքի իրականացմանը խոչընդոտելուն, 9-ը՝ քվեարկության գաղտնիությունը խախտելուն, 11-ը՝ ընտրակաշառք տալուն, 3-ը՝ կեղծ քվեաթերթ իրացնելուն, 2-ը՝ քարոզչություն կատարելուն կամ քարոզչություն կատարելուց հրաժարեցնելուն հարկադրելուն, 9-ը՝ այլ խախտումների:
6 դեպքերով հարուցվել են քրեական գործեր, որոնցից 2-ը՝ մեկից ավելի անգամ կամ այլ անձի փոխարեն քվեարկելու փորձ կատարելու, 2-ը՝ ընտրակաշառք առաջարկելու, 1-ը՝ ընտրողի ազատ կամքի իրականացմանը խոչընդոտելու, 1-ը՝ վստահված անձի լիազորությունների իրականացմանը խոչընդոտելու հանցագործությունների առերևույթ հատկանիշներով:
4 քրեական գործով նախաքննությունն իրականացվում է ՀՀ հատուկ քննչական ծառայությունը, 2-ով՝ ՀՀ քննչական կոմիտեն։
