ԵՐԵՎԱՆ, 27 հունվարի – Sputnik. Հայկական տեղեկատվական դաշտը խոցելի է տարատեսակ ապատեղակատվություն տարածելու առումով։ Sputnik Արմենիային այս մասին ասաց ԵՊՀ իրանագիտության ամբիոնի վարիչ Վարդան Ոսկանյանը։
Ավելի վաղ ադրբեջանական ԶԼՄ–ները տեղեկություն էին տարածել, թե Իրանի ԶՈւ գլխավոր շտաբի պետ Մոհամմադ Բաղերին Ադրբեջանի նախագահ Իլհամ Ալիևի հետ հանդիպման ժամանակ իբր հայտարարել է, որ Ղարաբաղն ադրբեջանական տարածք է, սակայն իրանական աղբյուրներում նման տեղեկություն չկար։
Ոսկանյանի խոսքով` Բաղերիի այցի առաջին օրը ադրբեջանական մամուլում սխալ տեղեկություն էր հայտնվել, որը, ցավոք, վերատպվել էր IRNA իրանական գործակալության ռուսալեզու տարբերակում։
«Շուտով այդ տեղեկությունը հանեցին, քանի որ իրանցիները ևս հասկացան, որ դա ապատեղեկատվություն է։ Ամեն դեպքում տհաճ է, որ այն հայտնվեց իրանական մամուլում, թեև միայն ռուսալեզու տարբերակում», – ասաց Ոսկանյանը։
Նա ուշադրություն հրավիրեց այն հանգամանքին, որ հաղորդագրությունը հայտնվեց նաև հայկական ԶԼՄ–ներում, որոնք հղում էին անում ադրբեջանական լրատվամիջոցներին։
«Որոշ ԶԼՄ–ներ սենսացիա են փնտրում, կամ լրագրողները բավարար պրոֆեսիոնալ չեն։ Առանց տեղեկության իսկությունը ստուգելու` նրանք այն հայկական տիրույթ են տեղափոխում։ Դա վտանգի տակ է դնում տեղեկատվական ընդհանուր անվտանգությունը` ընթերցողներին և հանդիսատեսին ակնհայտ սուտ փոխանցելով», – ասաց Ոսկանյանը։
Այդ սուտն ուղղված է հասարակության մեջ անհանգստություն ստեղծելուն։ Իսկ ԶԼՄ–ներն այդ հարցում միջնորդի դեր են կատարում։
Պետք է առանձնակի զգուշությամբ վերաբերվել ադրբեջանական ԶԼՄ–ների տարածած տեղեկությանը։
Նա նշեց, որ ՀՀ ՊՆ–ն արձագանքել է այս լուրին և կազմակերպել Երևանում Իրանի ռազմական կցորդ Մահդի Վեջդանիի և ՀՀ ՊՆ պաշտպանական քաղաքականության վարչության պետ Լևոն Այվազյանի հանդիպումը։ Հանդիպման ընթացքում Վեջդանիի արած հայտարարությունը վերջակետ դրեց այս հարցում։ ԻԻՀ ռազմական կցորդը վերահաստատել է Իրանի` բազմիցս արտահայտած հավասարակշռված դիրքորոշումն արցախյան հիմնախնդրի վերաբերյալ, ընդգծել է, որ այն որևէ փոփոխությունների չի ենթարկվել և մամուլում ներկայացվող տեղեկատվությունն ու դրա զանազան մեկնաբանություններն աղավաղում են այն:
