ԵՐԵՎԱՆ, 25 փետրվարի — Sputnik. ՌԴ նախագահին առընթեր գործարարների իրավունքների պաշտպան Բորիս Տիտովն ու ՀՀ վարչապետ Նիկոլ Փաշինյանը պայմանավորվել են հայ–ռուսական գործարար համաժողով անցկացնել։ Sputnik Արմենիա մուլտիմեդիոն մամուլի կենտրոնում կազմակերպած Մոսկվա-Երևան-Մինսկ-Քիշնև-Տալլին տեսակամուրջի ժամանակ այս մասին ասաց Տիտովը։
«Հանդիպման ժամանակ քննարկեցինք Ռուսաստանի և Հայաստանի գործակցությանը վերաբերող հարցեր, նախնական պայմանավորվածություն ձեռք բերեցինք հայ–ռուսական գործարար համաժողով անցկացնելու մասին։ Ամսաթիվը չենք հստակեցրել։ Մեր երկրները բարեկամական թելերով ենք կապված», – ասաց Տիտովը։
Նրա խոսքով` դա առաջին հանդիպումն էր, և ռուսական կողմին հետաքրքիր էր` ինչ կարծիք ունի Հայաստանը տնտեսական հարցերի վերաբերյալ։ Հանդիպումների ընթացքում քննարկվել են նաև փոքր և միջին բիզնեսի զարգացումն ու այլ նախաձեռնությունները։ Նա ընդգծեց, որ Հայաստանում այսօր տնտեսական ռազմավարություն է մշակվում, թիմ է պատրաստվում, որը պետք է մշակի բոլոր փուլերը։
Հիշեցնենք, որ հունվարի 22-25-ը Դավոսում տեղի է ունեցել Համաշխարհային տնտեսական ֆորումը, որին մասնակցել է նաև վարչապետ Նիկոլ Փաշինյանի գլխավորած պատվիրակությունը։
Հայաստանը ֆորումին երրորդ անգամ էր մասնակցում. առաջին անգամ մասնակցել է 2009 թվականին, երկրորդ անգամ` նախորդ կառավարության օրոք 2018 թվականին։
