ԵՐԵՎԱՆ, 2 ապրիլի — Sputnik. ՌԴ նախագահ Վլադիմիր Պուտինն ու Ադրբեջանի նախագահ Իլհամ Ալիևը երեքշաբթի հեռախոսազրույց են ունեցել։ Ինչպես հայտնում է Կրեմլի մամուլի ծառայությունը, Ալիևը խոսել է մարտի 29-ին ՀՀ վարչապետ Նիկոլ Փաշինյանի հետ հանդիպման գնահատականների մասին։
Ռուսաստանի նախագահն ընդգծել է Երևանի և Բաքվի միջև բանակցային գործընթացի աշխուժացման կարևորությունը։ Ռուսաստանը պատրաստակամություն է հայտնել հետագայում ևս աջակցել ղարաբաղյան հիմնախնդրի խաղաղ կարգավորման ուղիներ գտնելու հարցում, մասնավորապես` ԵԱՀԿ ՄԽ ձևաչափում։
Երկկողմ օրակարգի հարցերի քննարկման ժամանակ հաստատվել է երկուստեք տրամադրվածությունը` տարբեր ոլորտներում փոխշահավետ համագործակցության ընդլայնման վերաբերյալ։
Հիշեցնենք, որ ավելի վաղ` երկուշաբթի, ղարաբաղյան հակամարտության կարգավորմանը վերաբերող հարցեր էին քննարկել Փաշինյանն ու Պուտինը։
Մարտի 29-ին Ավստրիայի մայրաքաղաքում տեղի ունեցավ Նիկոլ Փաշինյանի և Իլհամ Ալիևի պաշտոնական առաջին հանդիպումը։ Հանդիպման արդյունքում առաջնորդներն ընդգծել են խաղաղության և երկխոսության բարենպաստ մթնոլորտի ձևավորման կարևորությունը։ Դրա համար նրանք նշել են կոնկրետ և շոշափելի քայլերի կարևորությունը։
