ԵՐԵՎԱՆ, 23 ապրիլի — Sputnik. Ռուսական ԶԼՄ–ներում հակահայկական թեմաներ չկան, քանի որ Հայաստանի ու հայերի նկատմամբ վերաբերմունքն ավանդաբար դրական է եղել։ Այսօր լրագրողների հետ զրույցում այս մասին ասաց Ռուսաստանում Հայաստանի դեսպան Սերգեյ Կոպիրկինը։
Օրեր առաջ «Իմ քայլը» խմբակցության պատգամավոր Նարինե Թուխիկյանը բարձրացրել էր ռուսական մի շարք հեռուստաընկերությունների հեռարձակումը սահմանափակելու հարցը` ասելով, որ «Միր», «ОРТ» և «Росcия 1» հեռուստաընկերությունների որոշ ծրագրերում քաղաքական կոչեր են հնչում։ Թուխիկյանին ի պատասխան Հեռուստատեսության և ռադիոյի ազգային հանձնաժողովի նախագահ Տիգրան Հակոբյանն իր հերթին նշել էր, որ դա քաղաքական հարց է։
Կոպիրկինը նշեց, որ ինքը չի կարող ասել, թե հետևում է ռուսական հեռուստաընկերությունների բոլոր ծրագրերին, բայց չի կարծում, որ կարելի է խոսել հակահայկական հռետորության մասին։
«Կարող են լինել ինչ–որ մարդկանց ինչ–որ գնահատականներ։ Բայց ինչ վերաբերում է ռուսական ԶԼՄ–ներում հայկական թեմատիկան լուսաբանելուն, ապա կարծում եմ, որ չի կարելի հակահայկական անվանել։ Դա ընդհանուր առմամբ չի համապատասխանում ռուս բնակչության և հեռուստադիտողների կարծիքին», – ասաց Կոպիրկինը։
Նա հավաստիացրեց, որ ռուսական հասարակությունում Հայաստանի և հայերի նկատմամբ վերաբերմունքն ավանդաբար շատ դրական է ու բարյացակամ։ Բայց հայ պատգամավորներն իրավունք ունեն հնչեցնել այն գնահատականները, որոնք անհրաժեշտ են համարում։ Դեսպանն էլ հայտնում է իր կարծիքը։