ԵՐԵՎԱՆ, 23 ապրիլի — Sputnik. «Էրեբունի» ռուսական ավիաբազայի զարգացման նախագծեր կան, սակայն դրա լիակատար վերազինման մասին տվյալներ չկան։ Այսօր կայացած ասուլիսի ժամանակ այս մասին ասաց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը` մեկնաբանելով ԶԼՄ–ներում հայտնված տեղեկությունները:
Ավելի վաղ ռուսական ռազմական գերատեսչությունում ՏԱՍՍ–ի աղբյուրը հայտնել էր, որ «Էրեբունի» ռազմակայանում առկա ՄիԳ–29 ինքնաթիռները կփոխարինվեն 4++ սերնդի Սու–30ՍՄ բազմաթիրախային կործանիչներով։
«Ես պատրաստ չեմ խոսել այդ մասին։ Կան զարգացման որոշակի նախագծեր, բայց ինչ վերաբերում է լիակատար վերազինմանն ու նոր տեխնիկայով հագեցնելուն, տեղյակ չեմ նման ծրագրերից», – ընդգծեց Կոպիրկինը։
Ինչպես հաղորդում է ՏԱՍՍ–ը, ավիաբազան նախատեսվում է Սու–30ՍՄ–ով վերազինել հաջորդ տարի։ Ինքնաթիռներ կստանան երկու փուլով` 2020-2021թթ–ին։
Երևանի Էրեբունի օդանավակայանում տեղակայված ռուսական ավիակայանը ձևավորվել է 1995 թվականին: 1998 թվականի նոյեմբերին ՌԴ-ից ավիակայան են տեղափոխվել ՄիԳ-29 կործանիչները։ 2001 թվականի հուլիսին Էրեբունիում տեղակայված մասերից ստեղծվել է ավիակայան, որը դարձել է Գյումրիում տեղակայված 102 ռազմակայանի օդային բաղադրիչը։
2013 թվականի վերջին ավիակայանի կազմում ընդգրկվել է ուղղաթիռային էսկադրիլիան։ 2015 թվականի դեկտեմբերին 2016 թվականի փետրվարին ՌԴ–ից այստեղ են տեղափոխվել հարվածային Մի-24Պ–ներն ու ռազմատրանսպորտային Մի-8ՄՏ ուղղաթիռները։
