ԵՐԵՎԱՆ, 13 մայիսի — Sputnik. ՀՀ վարչապետի մամուլի քարտուղար Վլադիմիր Կարապետյանը վստահ է, որ ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի միջև շփում կլինի Բրյուսելում «Արևելյան գործընկերության» ծրագրի 10-ամյակին նվիրված միջոցառման շրջանակում։ Նա այս մասին ասաց այսօր Լյուքսեմբուրգում լրագրողների հետ զրույցում։
«Վստահ եմ, որ շփում կլինի, սակայն պարզ չէ` ինչ կարգով,»,– ասաց նա։
Կարապետյանն ավելացրեց նաև, որ նախնական պայմանավորվածություն չկա, որ Փաշինյանն ու Ալիևը պետք է հանդիպեն ու զրուցեն։
Sputnik Արմենիայի լրագրողի հարցին, թե այս պահին կողմերի շփման կարիքը կա՞, Կարապետյանը պատասխանեց, որ ինքը միշտ կողմ է երկխոսության` տարբեր մակարդակներում։
«Վարչապետի և Ադրբեջանի նախագահի, ինչպես նաև արտգործնախարարների մակարդակով հանդիպումից հետո ընդունվել է հայտարարություն, որը բավականին նշանակալի զարգացում է։ Վաղուց չունեինք նման` հրապարակային արտահայտված ու հեռանկար պարունակող մոտեցում երկու երկրների կողմից»,–ասաց Կարապետյանը։
Նա հայտնեց նաև, որ Բրյուսելում պաշտոնական ճաշի ժամանակ նաև ելույթներ են նախատեսված։
Վարչապետ Նիկոլ Փաշինյանը տիկնոջ՝ Աննա Հակոբյանի հետ մայիսի 12-13-ին աշխատանքային այցով մեկնել է Լյուքսեմբուրգի Մեծ Դքսություն և Բրյուսել:
Հիշեցնենք, որ ապրիլի 15-ին Մոսկվայում Ռուսաստանի նախաձեռնությամբ կայացավ Հայաստանի, Ադրբեջանի և Ռուսաստանի ԱԳ նախարարներ Զոհրաբ Մնացականյանի, Էլմար Մամեդյարովի և Սերգեյ Լավրովի աշխատանքային հանդիպումը, որին նաև մասնակցեցին ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա), Էնդրյու Շոֆերը (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրչիկը:
Հայաստանի և Ադրբեջանի ԱԳ նախարարները վերահաստատել են կողմերի մտադրությունը շարունակելու քաղաքական-դիվանագիտական միջոցներով ղարաբաղյան հակամարտության կարգավորման ուղղությամբ ջանքերը:
Ընդգծվել է շահագրգռվածությունը հակամարտության գոտում իրադրության հետագա կայունացման ուղղությամբ, մասնավորապես գյուղատնտեսական աշխատանքների ժամանակաշրջանում: Նրանք նաև պայմանավորվել են փոխադարձության հիման վրա միջոցներ ձեռնարկել թույլատրելու կողմերի տարածքում կալանքի մեջ գտնվող անձանց հարազատների այցերը: Նախարարները պատրաստակամություն են հայտնել գործնական միջոցներ ձեռնարկել մարդկանց միջև շփումների հաստատման ուղղությամբ, այդ թվում ԶԼՄ-ների ներկայացուցիչների փոխադարձ այցելությունների միջոցով:
