ԵՐԵՎԱՆ, 19 մայիսի — Sputnik. Նիկոլի սիրտը հիմա էլ դատավորի միս է ուզում, և վաղը նա գրոհ է կազմակերպելու դատական համակարգի վրա։ Այս մասին Facebook–ի իր էջում գրել է ՀՀԿ փոխնախագահ Արմեն Աշոտյանը։
«Իր պաշտոնավարման առաջին տարվանը նվիրված ասուլիսին Նիկոլ Փաշինյանը հայտարարել էր, որ որոշ հարցեր ավելի հեշտ կլուծեր փողոցով, քան վարչապետի կաբինետից։ Այսօր Նիկոլ Փաշինյանի ջղաձիգ գրառումներից պարզ դարձավ, թե ինչ ի նկատի ուներ նա»,–գրել է նա։
Նրա խոսքով` ամիսներ շարունակ Փաշինյանը փորձ է անում կուլ տալ նաև չորրորդ իշխանությունը։ Ըստ Աշոտյանի` Փաշինյանի քաղաքական ախորժակը, փաստորեն, չի զիջում իր ուտելու մոլուցքին։
«Թե կողքը դեռ խելամիտ մարդիկ մնացել են, ապա ձեր իսկ շահերից ելնելով, փորձեք բացատրել ձեր վարչապետին, որ այդքան համփ արածը չի մարսվելու ու դուրս է գալու ոչ միայն իր, այլև, ցավոք, պետության քթից»,–գրել է նա։
Հիշեցնենք, որ Փաշինյանը հայտարարել է, որ վաղն առավոտյան ժամը 08.30-ից պետք է արգելափակել հանրապետության՝ առանց բացառության բոլոր դատարանների ելքերն ու մուտքերը` այնպես, որ ոչ ոք ներս չմտնի։ Նա հայտնել է նաև, որ վաղը՝ մայիսի 20-ին, ժամը 12։00-ին ուղիղ եթերով հանդես կգա ելույթով։
