01:36 23 հուլիսի 2019
Ուղիղ եթեր
  • USD476.18
  • GBP593.70
  • EUR534.18
  • RUB7.56
ՀՀԿ

Քոչարյանի կալանավորումը շարունակվող քաղաքական վրեժխնդրության հերթական դրսևորումն է. ՀՀԿ

© Sputnik / Nelli Danielyan
Քաղաքականություն
Ստանալ կարճ հղումը
19410

Հանրապետական կուսակցությունը հայտարարություն է տարածել և անդրադարձել ՀՀ երկրորդ նախագահ Ռոբերտ Քոչարյանին կալանավորելու փաստին։

ԵՐԵՎԱՆ, 26 հունիսի — Sputnik. ՀՀ երկրորդ նախագահ Ռոբերտ Քոչարյանի` թվով երրորդ կալանավորումը շարունակվող քաղաքական վրեժխնդրության հերթական դրսևորումն է, որով փորձ է արվում նաև շեղել հայ ժողովրդի ուշադրությունը երկրում օրեցօր կուտակվող բազում խնդիրներից: Այս մասին նշված է Հայաստանի Հանրապետական կուսակցության հայտարարության մեջ։

«Վերաքննիչ քրեական դատարանը կոպտորեն ոտնահարել է մրցակցային դատավարության սկզբունքը և կայացրել է բացառապես քաղաքական որոշում: Նշված գործընթացը որևէ աղերս չունի ժողովրդավարության, իրավունքի գերակայության և դատական իշխանության անկախության հետ։ Նման զարգացումները վնաս են հասցնում ՀՀ ներքաղաքական իրավիճակին և միջազգային վարկանիշին»,– նշել են հանրապետականները։

Միաժամանակ կուսակցությունն ընդգծել է, որ առնվազն զավեշտալի են իշխանական քարոզչական մեքենայի ջանքերը ՀՀ վարչապետ Նիկոլ Փաշինյանի վարկանիշի շարունակական անկումը բացատրել Ռոբերտ Քոչարյանի կամ այլ ընդդիմադիր գործիչների կալանքի տակ չգտնվելու հանգամանքով:

ՀՀԿ գործադիր մարմնի հավաստմամբ` երկրում շարունակաբար խրախուսվում է հասարակության պառակտման գործընթացը, որն առավել վտանգավոր է դառնում տարածաշրջանային խիստ մտահոգիչ մարտահրավերների ֆոնին։

«Այսպիսի որոշումներն ապացուցում են, որ ազդարարված դատաիրավական բարեփոխումների և դատարանների անկախության աստիճանը բարձրացնելու մասին հայտարարությունները կեղծ են: Հանրապետականն այս հարցի և նրա շուրջ զարգացումների մասին բարձրաձայնելու է նաև միջազգային համապատասխան հարթակներում և ձևաչափերով»,–նշված է հայտարարության մեջ։

Հիշեցնենք, որ երեկ վերաքննիչ դատարանը որոշում կայացրեց փոխել Քոչարյանի խափանման միջոց անձնական երաշխավորությամբ ազատ արձակելը կալանավորմամբ։ Դատարանը հայտարարեց նաև Սահմանադրական դատարան դիմելու, Քոչարյանի գործով վարույթը կասեցնելու, ինչպես նաև դատական գործը դարձյալ ընդհանուր իրավասության դատարան՝ նոր քննության ուղարկելու որոշման մասին:

Այդ դատական նիստին չէին մասնակցում ո՛չ Քոչարյանը, ո՛չ էլ նրա պաշտպանները։ Նրանք հայտարարել էին, որ նիստը բոյկոտել են դատավորի պահվածքի պատճառով։ Նշենք, որ Քոչարյանն ավելի քան 1 ամիս ազատության մեջ էր։ Մայիսի 14-ին ԼՂՀ նախկին և ներկա նախագահներ Բակո Սահակյանն ու Արկադի Ղուկասյանը նրան կալանքից ազատելու երաշխավորագիր էին ներկայացրել դատարան, ինչից հետո Քոչարյանն ազատ էր արձակվել։

Մինչ այդ, գործի նախաքննության փուլում, Արցախի նախագահները նույնաբովանդակ միջնորդություն էին ներկայացրել նաև ՀՀ գլխավոր դատախազին։ Մայիսի 16-ին Արցախի նախագահները ներկայացել էին դատարան ու հաստատել իրենց երաշխավորագիրը` որպես անձնական երաշխիք վճարելով 500 000-ական դրամ։

Ըստ թեմայի

Ռոբերտ Քոչարյանը տեղափոխվեց ԱԱԾ մեկուսարան
Կարևոր է դատավորի անձը, որը տղամարդկություն կունենա օրենքով առաջնորդվել. Լևոն Քոչարյան
ԲՀԿ-ն Քոչարյանի գործում քաղաքական ենթատեքստ չի տեսնում
«Լուսավոր Հայաստանի» համար Քոչարյանի գործն առաջնային նշանակություն չունի
թեգերը:
Հայաստան

Գլխավոր թեմաներ